दुईवटा चिनी उद्योगले भुक्तानी दिन आलटाल गरेको उखु किसानको गुनासो

सर्लाही, २१ चैत / सर्लाहीका दुईवटा चिनी उद्योगले किसानहरूको भुक्तानी दिन आलटाल गरेका छन् । उखु क्रसिङ सकेर बन्द भएका जिल्लाका दुईवटा चिनी उद्योगले किसानहरूको भुक्तानी दिन आलटाल गरेका हुन् ।
अन्नपूर्ण चिनी उद्योग धनकौल र महालक्ष्मी चिनी उद्योग बगदहलाई उखु दिएका किसानहरूले मिल बन्द भएको एक महिनासम्म पनि भुक्तानी नपाएको गुनासो गरेका छन् । यी दुवै चिनी उद्योगबाट महिनौँसम्म भुक्तानी नपाउँदा किसानहरूले बर्सेनि आन्दोलन गर्दै आइरहेका गोडैता नगरपालिका(९, का किसान सीताराम यादवले बताउनुभयो । उहाँका अनुसार सुरुमा केही किसानलाई भुक्तानी दिएर यी दुवै चिनी उद्योगका सञ्चालक अहिले आफूहरूसँग सम्पर्कभन्दा बाहिर रहेका हुन् । “सुरुमा केही किसानहरूलाई भुक्तानी दिइयो, त्यसपछि बाँकी किसानहरूको पैसा दिन चिनी उद्योगहरूले वास्तै गरेनन्”, गोडैताका अर्का किसान रामकिरण यादवले भन्नुुभयो । चिनी उद्योग बन्द भएको एक महिनासम्म पनि उद्योगी सम्पर्कमा नआउँदा आफूहरूलाई व्यवहार धान्न गाह्रो परिसकेको किसान यादवले बताउनुभयो ।
उद्योगले उखु बेचेको पैसा नदिँदा बालबालिकाको विद्यालयमा शुल्क बुझाउन मात्र नभई आफ्नो घरखर्चसमेत धान्न नसक्ने अवस्था आएको अर्का उखु उत्पादक किसान राजकरण यादवले बताउनुभयो । “उखु खेतीबाटै व्यवहार चलाउने आफू जस्ता दर्जनौँ उखु उत्पादक किसानहरू उद्योगबाट पैसा नपाउँदा साहुमहाजनबाट ऋण लिन बाध्य भएका छन्”, राजकरणले गुनासो गर्नुभयो । उखुको पैसा नपाउँदा उखु काट्ने, ढुवानी गर्ने टू्याक्टरको पैसा तिर्न नपाएको धनकौल गाउँपालिका(३, का उखु किसान रामस्वार्थ साहले गुनासो गर्नुभयो । “उखु फलाउँदादेखि उद्योगसम्म लगेर बुझाउँदासम्मको उधारो छ तर उद्योगले कहिले पैसा दिन्छ भन्ने अयौल छ”, उखु किसान साहले भन्नुभयो ।बेलैमा भुक्तानी नदिने समस्याका कारण पछिल्ला वर्षमा जिल्लाका किसानहरूले अन्यत्र ठाउँका चिनी उद्योग र सख्खर बनाउने उद्योगलाई उखु बेच्न थालेका उखु उत्पादक किसान राजकुमार उप्रेतीले बताउनुभयो । उहाँका अनुसार पछिल्लो समय जिल्लाका उखु उत्पादक किसानहरू उखुभन्दा अन्य खेतीतर्फ समेत आकर्षित हुन थालेका छन् । जिल्लाका तीनवटा चिनी उद्योगमध्ये इन्दुशङ्कर चिनी उद्योग हरिवनबाट भने उखु किसानले भुक्तानी पाइरहेका भएपनि अन्नपूर्ण चिनी उद्योग धनकौल र महालक्ष्मी चिनी उद्योग बगदहले हरेक वर्ष उखु उत्पादक किसानलाई पैसा दिन आलटाल गरेको उत्पादक किसान महासङ्घ नेपालका अध्यक्ष कपिलमुनि मैनालीले बताउनुभयो ।
जिल्लाका अन्य उद्योगले किसानको भुक्तानी समयमै नगर्दा उखु खेती घटेको र त्यसको प्रत्यक्ष प्रभाव इन्दुशङ्कर चिनी उद्योगलाई परेको उद्योगका प्रबन्धक योगनारायण रजकले बताउनुभयो । रासस