वीरगंज (पर्सा), १३ चैत / गुठी संस्थान को ५२ बिगहा जग्गामा अवैध माटो उत्खनन् र ठेक्काको दुरुपयोग गर्नेमाथि कारवाही गरिने भएको छ । गुठी संस्थानले बाली लगाउनको लागि ठेक्कामा दिएको जग्गा उत्खनन् गर्नेलाई कारवाही गर्ने भएको जनाएको छ ।
वीरगंज महानगर पालिकाले अनुमति बिना माटो उत्खनन् गर्ने स्काभेटर सहित ४ वटा टिपर नियन्त्रणमा लिएको थियो । अवैध उत्खनन गरेको जग्गा गुठी संस्थानको रहेको पाइएको छ । गुठी संस्थान वीरगंजका प्रमुख चुडामणि घिमिरे र बीरगन्ज महानगरपालिका कार्यालयका पदाधिकारीहरुले अबैध उत्खनन् भइरहेको जग्गाको सोमबार स्थलगत निरीक्षण गरेको थियो ।
निरीक्षणको क्रममा वीरगंज महानगरपालिका वडा नम्बर २८ साविक बगही गाविस वडा न ९ दर्दवा स्थित गुठीको सार्वजनिक जग्गामा करिब २ महिना भन्दा अघिदेखि अवैध रुपमा उत्खनन् गरिदै आएको स्थानीयले बताएका छन् । दर्दवा स्थित नदिको छेउबाट निरन्तर रुपमा उत्खनन् भइरहेको हुँदा यसले भविष्यमा पुरै गाउँनै डुबानको जोखिममा परेको स्थानीय रामाज्ञा राउतले बताए ।
साविक एलानी पर्ती र गुठीको करिब ५२ बिगहा जग्गामा छठ घाट, समसानघाट, गौचन रहेको र अहिले गुठी संस्थानले सो जग्गा बाली लगाउन ठेक्कामा दिएकोमा आफ्नो मनमर्जी रुपमा माटो कटान गरेर प्रति टिपर १ हजारमा दैनिक २ सय टिपर माटो उत्खनन् गरि रहेको स्थानीय रामाधार प्रसाद पटेलले बताए ।
गुठी संस्थान वीरगंजका कार्यालय प्रमुख चुडामणि घिमिरेले खेती गर्न ठेक्कामा लिएको जग्गाको दुरुपयोग भएको बताए । उनले करिब ५२ बिगहा जग्गा गुठीको रहेको जसमा माटो कटान गरि गाउँ नै डुवानमा हुने देखिएको हुनाले अनुमति विना उत्खनन् गर्नेहरुलाई कारवाही गरिने बताए ।
नगर प्रहरी निरीक्षक हरिप्रसाद भुषालका अनुसार ना ८ ख ४१२५, ना ७ ख ६५९७, ना ७ ख ६६०३ र ना ८ ख५४०३ नम्बरको टिपर र बा २ ख ६२३३ नम्बरको स्काभेटर महानगरले नियन्त्रणमा लिएर वीरगंजको आदर्शनगर स्थित बालमन्दिरको परिसरमा राखिएको छ ।
प्रतिक्रिया दिनुहोस् !