रसायनिक मल अनुदानमा गरिएको कटौती फिर्ता गर्न माग गर्दै ज्ञापन

वीरगंज (पर्सा), ३ चैत / नेपाल सरकारले किसानहरुको सहुलियतको लागि रसायनिक मलमा उपलब्ध गराउँदै आएको अनुदान कटौतिप्रति किसानहरुको विरोध जनाएका छन् । नेपाल किसान संघ पर्साका सभापति अरविन्द त्रिपाठीको नेतृत्वमा जिल्ला प्रशासन कार्यालय पर्सा पुगेका किसानहरुको समूहले रसायनिक मल अनुदानमा नेपाल सरकारले गरेको कटौतीको विरोध गर्दै सहायक प्रमुख जिल्ला अधिकारीलाई ज्ञापन पत्र बुझाएका हुन् ।
नेपाल किसान संघद्वारा आयोजित देश ब्यापी ज्ञापन पत्र बुझाउने क्रममा शुक्रबार पर्साका किसानहरु पर्साका सहायक प्रमुख जिल्ला अधिकारी भीमकान्त पौडेललाई ज्ञापन पत्र बुझाएका हुन् । उनीहरुले नेपाल सरकारलाई दबाब दिने उद्देश्यले रसायनिक मलको अनुदान कटौती फिर्ता लिनुपर्ने माग गरेका छन् । सरकारले तत्काल अनुदान कटौती फिर्ता नलिए आन्दोलनमा उत्रने चेतावनी समेत दिएका छन् ।
सरकारले रासायनिक मलमा किसानलाई दिँदै आएको अनुदान कटौती गरेसँगै समयमा मल पाउन नसकेका किसानले अब मूल्य पनि बढि तिर्नुपर्ने अवस्था सृजना भएको छ । प्रधानमन्त्री पुष्पकमल दाहाल प्रचण्ड स्वयंले सम्हालेको कृषि तथा पशुपन्छी मन्त्रालयले २७ फागुनमा मलमा दिँदै आएको अनुदान कटौती गर्ने निर्णय गरेको हो ।
यसअनुसार सोमबार (२९ फागुन) मध्यान्ह १२ बजेपछि आयात भएको मल किसानले किलोमै ११ रुपैयाँसम्म महंगो तिर्नुपर्नेछ । मन्त्रालयका प्रवक्ता प्रकाशकुमार सञ्जेलका अनुसार २६ फागुन अघिको तुलनामा अब युरिया मल किलोमा ११ रुपैयाँ, डिएपी ७ र पोटास ९ रुपैयाँले महँगो पर्नेछ ।
बढेको मूल्यअनुसार किसानले यूरिया मलको प्रतिकिलो मूल्य २५ रुपैयाँ, डीएपीको ५० रुपैयाँ र पोटासको ४० रुपैयाँ तिर्नुपर्ने छ । यसअघि १४ रुपैयाँमा यूरिया, ४३ रुपैयाँ किलोमामा डीएपी र ३१ रुपैयाँ किलोमा पोटास मल किन्न पाइन्थ्यो ।