२९ लाख भन्दा बढी मूल्यको अवैद्य सामान सहित ट्रक प्रहरीको नियन्त्रणमा

• मुस्कान श्रेष्ठ
वीरगंज (पर्सा), २४ पुस / पर्सा प्रहरीले भन्सार छलीकोे २९ लाख भन्दा बढी मूल्यको मालसामानसहित ट्रक नियन्त्रणमा लिएको छ । वीरगञ्ज महानगरपालिका वडा नं.१६ नगवा स्थित सडकखण्डमा ना ६ ख ४७५६ नम्बरको मालवाहक ट्रक प्रहरीले नियन्त्रणमा लिएको हो ।
गत पुष २२ गते बिल बिजक भन्दा बढीको सामान वीरगञ्जबाट झापातर्फ लगिरहेको सूचना पाए लगतै जिल्ला प्रहरी कार्यालय पर्साबाट खटिएको प्रहरी टोलीले उक्त ट्रक चेकजाँच गर्ने क्रममा पूर्वाञ्चल ट्रासपोर्टबाट पठाईएको ट्रकमा आलमुनियम, नरिवल तथा बदाम बरामद भएको पर्साका प्रहरी प्रवक्ता एवम प्रहरी नायब उपरीक्षक दिपक गिरीले जानकारी दिनुभयो ।
बरामद गरिएको सामानको मूल्य २९ लाख ६९ हजार ९ सय ३ रुपैयाँ मूल्यांकन गरी थप अनुसन्धान तथा आवश्यक कारवाहीको लागि आज राजश्व अनुसन्धान कार्यालय पथलैया, बारामा बुझाइएको डिएसपी गिरीले बताउनुभयो ।