वीरगंज (पर्सा), २० पुस / भारतमा पछिल्लो पटक कोरोना भाइरसको सङ्क्रमण देखापरेपछि रोकथामका लागि वीरगंज नाकामा उच्च सतर्कता अपनाइएको छ । भारतमा कोभिड सङ्क्रमित दैनिक बढिरहेकाले त्यहाँबाट वीरगंज हुँदै नेपाल प्रवेश गर्ने यात्रुलाई अनिवार्य जाँच गरेर मात्रै नेपाल भित्रिन दिने कार्यलाई तिब्रता दिइएको हो ।
कोरोना भाइरसको सङ्क्रमण छिमेकी देशमा फैलिरहेको र त्यसलाई यहाँ भित्रिन नदिन उच्च सतर्कता अपनाउनुपर्ने देखिएकाले मुख्य नाकामा रहेको हेल्थ डेस्कको सेवा प्रवाह थालिएको छ । हेल्थ डेस्कमा आवश्यक स्वास्थ्य उपकरण, मास्क, स्यानिटाइजर लगायतका सामग्रीको कुनै कमी हुन नदिने गरी चुस्त राख्न वीरगंज महानगरपालिकाका नगरप्रमुख राजेशमान सिंहले स्वास्थ्यकर्मीलाई निर्देशन दिएसँगै हेल्थ डेक्समा चेकजाँचको कार्यलाई तिब्रता दिइएको हो ।
अहिले दैनिक डेढ देखि २ सय जनासम्मको एन्टिजेन परीक्षण हुनाका साथै ३ देखि ४ सय जनाको स्क्रिनिङ गर्ने काम भइरहेको हेल्थ डेस्कका इन्चार्ज डा. अनिषा महतोले जानकारी दिइन् । उनका अनुसार अहिले खास गरेर भारतको भित्रि शहरहरु दिल्ली, कोलकत्ता, कर्नाटक लगायतका स्थानहरुबाट आएकाहरुलाई एन्टिजेन परीक्षण गर्ने गरएको छ । दैनिक विहान कोलकत्ताबाट ट्रन आउँछ, बेलुका दिल्लीबाट टेन आउँछ, त्यसमा पनि वर्तमान अवस्थामा भारतीय पर्यटकहरु पनि नेपाल भित्रिने क्रम बढ्दो छ, त्यसैले एन्टिजेन परीक्षण गरेर जसको नेगेटिभ भएमात्रै नेपाल प्रवेश गर्न दिइएको उनको भनाई छ ।
दुई महिना अघि मात्रै पाजेटिभ केस भेटिएको थियो, त्यो पनि भारतीय नागरिक नै हुनुहुन्थ्यो तर अहिले जसरी भारतमा कोरोना संक्रमण फैलि रहेको छ, त्यसैले चेकजाँचलाई अझै तिब्रता बनाउनुपर्ने उनको भनाई छ । हेल्थ डेस्कमा अहिले बिहान र बेलुकाको समयमा एन्टिजेन परीक्षण र शरीरको तापक्रम जाँच गर्ने गरिएको छ । विगत दुई वर्ष अगाडी पहिलो चरणको कोरोना संक्रमण शुरुवातीदेखि नै यो हेल्थ डेक्स स्थापना गरिएको हो । हेल्थ डेक्समा कोभिडसँगै मलेरिया, एच.आई.भि. एड्स पनि चेकजाँच गर्ने गरिएको उनको भनाई छ ।
प्रतिक्रिया दिनुहोस् !