वीरगंज (पर्सा), ७ मंसिर / पर्सा निर्वाचन क्षेत्र नं. १ को प्रतिनिधि सभा सदस्यमा जनता समाजवादी पार्टी (जसपा) नेपालका प्रदिप यादव पुनः विजयी भएका छन् । कडा प्रतिस्पर्धा रहेको यस क्षेत्रमा पूर्व मन्त्री समेत रहेका यादव एक हजार ६२० मतान्तरले विजयी भएका हुन् ।
एमाले–जसपा गठबन्धनका साझा उम्मेदवार समेत रहेका यादवले २२ हजार ५३७ मत ल्याएर विजयी हुँदा उनका निकटतम् प्रतिस्पर्धी स्वतन्त्र उम्मेदवार अजय कुमार द्विवेदीले २० हजार ९१७ मत प्राप्त गरेका छन् । यादवसंग पराजित भएका द्विवेदी नेपाली कांग्रेसका बागी उम्मेदवार थिए । द्विवेदी नेपाली कांग्रेस पर्साका पूर्व जिल्ला सभापति हुन् ।
प्रतिनिधि सभा सदस्यका अर्का उम्मेदवार राप्रपाका किरणमान डंगोल २ हजार ६ सय ५९ मत, ५ दलिय बाम लोकतान्त्रिक गठबन्धनका उम्मेदवार लोसपाका लक्ष्मण लाल कर्ण एक हजार ११७ मत, नेपाल लोकतान्त्रिक पार्टीका सुन्दर साह कानु २३७ मत, अर्का स्वतन्त्र उम्मेदवार नौसाद अंसारी २२७ मत, नेपाल कम्युनिष्ट पार्टी मार्कसवादीका शंकर प्रसाद चौरसिया १७३ मत, नेपाल सुशासन पार्टीका अजय कुमार रिजाल १४० मत पाएका छन् ।
अन्य एक दर्जन भन्दा बढी उम्मेदवारहरुले एक सय मत पनि कटाउन सकेका छैनन् । यस क्षेत्रबाट विगतमा दोश्रो पटक कुनै पनि नेता निर्वाचित नभएको इतिहासलाई तोड्दै यादव विजयी भएका हुन् । दोस्रो पटक यादव विजयी भएको खुशियालीमा उनको समर्थकले भव्य विजयी जुलुश निकालेका छन् ।
प्रतिक्रिया दिनुहोस् !