वीरगंजको विकासका लागि धेरै काम गरेको छु : मुख्यमन्त्री राउत

वीरगंज (पर्सा), २५ कात्तिक / मधेस प्रदेशका मुख्यमन्त्री एवम् प्रदेशसभा पर्सा क्षेत्र नं. १ को २ का उम्मेदवार लालबाबु राउतले मधेस सरकारले विभिन्न बाधा र अवरोधका बाबजुद पनि मधेसका जनताको पक्षमा ठोस काम गर्न सफल भएको दाबी गरेका छन् ।
बीरगंज महानगरपालिकाको वडा नम्बर १५ लक्ष्मनवा, नयाँबस्ती, भेडीयाही, भिषुवा, कृष्ण प्रणामी टोल, डिभाईन एरिया टोल लगायतका क्षेत्रमा शुक्रबार स्थानीय मतदाताहरूसँग भेटघाट तथा घरदैलो गर्दै मुख्यमन्त्री राउतले प्रदेश सरकारले गरेको कामको मूल्याङ्कन जनताले गर्ने बताए ।
उनले मधेसमा विद्यमान दाइजो प्रथाको अन्त्य गर्न छोरीलाई शिक्षा दिनुपर्ने कुरालाई जोड दिँदै बेटी पढाऊ बेटी बचाउ, छोरी बिमा कार्यक्रम लगायतका प्रभावकारी कार्यक्रमले गरिब र विपन्न वर्गका छोरीहरूलाई विद्यालय पुग्न सहज वातावरण बनाएको बताए । मुख्यमन्त्री राउतले बीरगंजको विकासका लागि धेरै काम गरेको हुँदा बीरगंजवासीले त्यसलाई नबिर्सिने बिश्वास व्यक्त गरे ।