हत्या आरोपमा देवर, भाउजु पक्राउ

गंजभवानीपुर (बारा), १८ भदौ / बारा प्रहरीले आफ्नै श्रीमतीको हत्याको आरोपमा श्रीमान र उनका भाउजुलाई पक्राउ गरेको छ । पक्राउ पर्नेमा महागढीमाई नगरपालिका – ३ गंजभवानीपुर टोल बस्ने २७ वर्षीय सैमोद्दिन अन्सारी र उनका भाउजू २५ वर्षीया अप्सना खातुन रहेको बारा प्रहरीले जानकारी दिएको छ ।
सैमोद्दिनको श्रीमती २५ वर्षीया सहनाज खातुनको हत्यामा संलग्नता देखिएकोले उनीहरुलाई पक्राउ गरिएको बाराका प्रहरी उपरीक्षक होबिन्द्र बोगटीले जानकारी दिए । अप्सना सहनाजकी जेठानी हुन् । भदौं १६ गते बिहीबार सहनाजको घरमै शंकास्पद मृत्यु भएको भनी सूचना प्रहरीले पाएपछि जिल्ला प्रहरी कार्यालय बाराबाट खटिएको प्रहरी टोलीले घटनास्थलको सुक्ष्म अवलोकन र अनुसन्धान गरेको थियो । मृतकको शरीरमा कुटपिट गरिएको घाउचोट देखिएकोले मृतकको लाश पोष्टमार्टमको लागि त्रि.वि. शिक्षण अस्पताल महाराजगंज, काठमाण्डौमा पठाईको छ ।
सहनाजको शरीरमा कुटपिट गरिएको घाउचोट देखिएपछि प्रहरीले सैमोदिनसँग सोधपुछ गर्दा सैमोदिनले घटनामा भाउजु अप्सना समेतको संलग्नता रहेको बताएका थिए । प्रहरीले बिहीबार नै उनीहरुलाई पक्राउ गरेर ल्याएको थियो ।
दुवै जनाविरुद्ध ‘कर्तव्य ज्यान’ मुद्दामा बारा जिल्ला अदालतबाट ७ दिनको म्याद लिई थप अनुसन्धान भइरहेको प्रहरी उपरीक्षक बोगटीले जानकारी दिए ।