वीरगन्ज (पर्सा), १५ जेठ / नेपाल सरकारले वीरगन्ज स्थित चिनी कारखाना लिमिटेडलाई संचालनमा ल्याउने घोषणा गरेको छ । आर्थिक वर्ष २०७९/०८० को लागि बजेट प्रस्तुत गर्ने क्रममा अर्थमन्त्री जनार्दन शर्माले दुइ दशक देखि बन्द रहेको वीरगन्ज चिनी कारखानालाई सरकारले संचालनमा ल्याउने घोषणा गरेका हुन् ।
विगत लामो समयदेखि बन्द रहेको वीरगन्ज चिनी कारखानाको साथसाथै कृषि औजार कारखानालाई पनि सरकारले पुनः संचालनमा ल्याउने कार्यक्रम बजेटमा समेटिएको अर्थमन्त्री शर्माले बताए ।
लामो समय देखि बन्द भइ रुग्ण अवस्थामा रहेका वीरगन्ज चिनी कारखाना र कृषि औजार कारखाना उपयुक्त ढाँचामा संचालनमा ल्याइने अर्थमन्त्री शर्माले बताए । तर कुन ढाँचामा संचालन गर्ने भन्ने विषयमा बजेटमा खुलाइएको छैन । पर्सा, बारा र रौतहटका झण्डै २० हजार किसानलाइ पाल्दै आएको वीरगन्ज चिनी कारखाना बन्द भएको दुइ दशक भइसकेको छ ।
तत्कालीन सोभियत संघ रुसको आर्थिक सहयोगमा नेपाल सरकारले २०२१ साल देखि सन्चालनमा ल्याएको वीरगन्ज चीनी कारखाना २०५९ सालमा बन्द भएको हो । तात्कालीन शाही सरकारले चिनी कारखाना घाटामा गएको भदै २०५९ साल फागुन १६ गते कारखाना बन्द गर्ने निर्णय गरेको थियो । यस्तै कृृषि औजार कारखाना पनि दुइ दशक देखि नै बन्द छ ।
प्रतिक्रिया दिनुहोस् !