वीरगन्ज, २२ चैत / नेकपा एमालेका अध्यक्ष केपी शर्मा ओलीले बोलेको अभिव्यक्तिलाई मधेशवादी दलका नेताले खण्डन गरेका छन् । वीरगन्जको घण्टाघर स्थित आयोजित वृहत्त जनसभा तथा पार्टी प्रवेश कार्यक्रमलाई सम्बोधन गर्दै अध्यक्ष ओलीले ‘केही स्वार्थीवादीहरुले केपी ओली मधेश विरोधी’ रहेको भनेर हल्ला फैलाएको भन्ने अभिव्यक्तिलाई लोकतान्त्रिक समाजवादी पार्टी (लोसपा) वीरगन्ज महानगर अध्यक्ष ओमप्रकाश सरार्फले खण्डन गर्दै विरोध जनाएका हुन् ।
सर्राफले सामाजिक सञ्जालमा स्टाट्स लेख्दै केपी ओलीको अभिव्यक्तिलाई विरोध जनाएका छन् । सर्राफले मधेस आन्दोलनको बेला ओलीले दिएका मधेश विरोधी अभिव्यक्तिहरुको समेत स्मरण गराएका छन् । नेता सरार्फले विभेद कायम रहेसम्म समृद्धि र दिगो बिकास सम्भव नहुने कुरा ओलीले बुझ्न बाकी रहेको टिप्पणी गरेका छन् । ‘मधेशवादी दलबाट आफ्नो पहिचान बनाई ‘ओली शरनम् गच्छामी’ भएका मधेशका गद्दारहरुले ओलीलाई सो कुरा छिट्टै बुझाउने छन् भन्ने विश्वास छ ।’ भनेर स्टाट्स लेखेका छन् ।
‘विभेदकारी संविधान जारी भएकै दिन ओली एण्ड कम्पनीले दिपावली र मधेशी जनताले शोक तथा कालो दिवसका रुपमा मनाएको दिन बिर्सन नहुने सर्राफको धारणा छ । ‘मधेश आन्दोलनमा ओलीले नरसंहार गर्दा ‘दुई–चार वटा आँप खस्दैमा केहि हुन्न’, मानव साङ्लोलाई माखे साङ्लो’ भन्ने ओलीको बोली तपाईंहरुले बिर्सनु भयो होला, तर मधेशी जनतालाई सदैब याद रहने छ ।’ भनेर मधेशीहरुको नाममा राजनीति गरेर पार्टी परिवर्तन गर्नेहरुलाई स्मरण गराएका छन् ।
सर्राफ अँझै थप्छन्, ‘शताब्दीयौँदेखी मधेशी र उत्पीडितलाई गुलाम बनाई राख्ने, उपनिवेश लादीरहने मधेश बिरोधी पार्टी र खासगरी ओलीलाई फुलको माला लगाउँदा तपाईहरुका हात काँपेनन् तर यस्ता दलबदलु गद्दारहरुलाई मत हाल्न जनताको हात अवश्य काँप्ने छन् ।’ मधेशवादी दल छाडेर एमाले प्रवेश गरेका नेताहरुप्रति केन्द्रित गर्दै सर्राफले भनेका छन ‘अधिकार तथा पहिचानको लडाइँको महान यात्राबाट तपाईंहरु क्षणिक स्वार्थ र लाभको कारण बिचलित हुनु र बाटो बिराउनु भयो, त्यसको लागि सहानुभूति छ । तर यो यात्रा अनवरत अगाडि बढी रहन्छ, किन कि मधेशी र उत्पीडितको विभेदको मुद्दा केही मुठी भर स्वार्थी नेताको मोहताज हैन ।’
प्रतिक्रिया दिनुहोस् !