• हरिशंकर शर्मा
वीरगन्ज २२ चैत / नेकपा एमाले अध्यक्ष केपी शर्मा ओलीले केही स्वार्थीवादीहरुले केपी ओली मधेश विरोधी रहेको हल्ला फैलाएको आरोप लगाएका छन् । वीरगन्जमा ‘समृद्ध नेपाल, सुखी नेपाली’ नारा सहित वीरगन्जमा आयोजित वृहत्त जनसभा तथा पार्टी प्रवेश कार्यक्रमलाई सम्बोधन गर्दै अध्यक्ष ओलीले आफै मधेशको बासिन्दा रहेको र विगत ६० वर्षदेखि मधेशमै बस्दै आएकोले केही स्वार्थीवादी नेताहरुले केपी ओली मधेश विरोधी रहेको हल्ला फैलाएको बताए ।
म आफै मधेशको मान्छे हो, ६० वर्षदेखि म मधेशको बासिन्दा हो, चापाकल कसरी गाड्नुपर्छ, भैसी राँगाको पिठ्युमा बसेर कसरी चलाईन्छ त्यो पनि थाहा छ, हलो कसरी जोत्नुपर्छ, खोलाबाट पैनी खनेर पानी कसरी खेतमा ल्याउनुपर्छ त्यो पनि मलाई थाहा छ भन्दै अध्यक्ष ओलीले मधेश विकासको थुप्रै कामहरु आफूले गरेको हुनाले केपी ओली मधेश विरोधी भनेर हल्ला फैलाउनेको कुनै औचित्य नरहेको बताए । उनले हुलाकी राजमार्ग निर्माण देखि सुनकोशी – मरिन डाइभर्सन बहुउद्देशीय आयोजनाको काम पनि आफैले शुरु गराएको दाबी गरे ।
पहाड भन्दा तराईमा भौतिक पूर्वाधारहरु निर्माण गर्न सजिलो भएको कारण पनि राजमार्गबाट सदरमुकाम आउन बाटो ६ लेनको बाटो हुनुपर्दछ, कम्तिमा चार लेनको बाटो हुनुपर्दछ भन्ने योजना सहित हुलाकी राजमार्गको निर्माण कार्य शुरु गर्न लगाएको बताउँदै अध्यक्ष ओलीले बारा, रौतहट, सर्लाही, महतोत्तरी, धनुषाका १ लाख ८५ हजार विघा जमिन सिचाई गर्ने ‘सुनकोशी–मरिन डाइभर्सन बहुउद्देश्यीय आयोजना’ को काम पनि आफैले शुरु गर्न लगाएको बताए ।
तराईमा यति विकास गर्दा पनि केही स्वार्थीवादीहरुले कपी ओली मधेश विरोधी रहेको हल्ला फैलाएको बताए । तराईमा सिचाई गर्न विकास गर्ने, सडक निर्माण गर्ने, भौतिक पूर्वाधार निर्माण गर्ने केपी ओली कसरी मधेश विरोधी ? भन्दै आफू प्रधानमन्त्री हुने वित्तिकै हुलाकी राजमार्ग शुरु गरेका थिए, जुन अहिले लगभग सम्पन्न भइसकेको छ, हामी कुरा मात्र होइन, काम गरेर देखाउने पार्टी रहेको बताए । यही तराईमा टोर्नाडो आउँदा बारा, पर्सामा भत्केका ८ सय ७९ घरहरु केही महिना भित्रै नेपाली सेनालाई आदेश दिएर निर्माण गरि हस्तान्तरण गरेको स्मरण गराए ।
उनले ४८ वर्ष अगाडि पर्सा स्थित कारागारमा ५ दिनसम्म बसेको हुनाले वीरगन्जसँग मेरो आत्मिय सम्बन्ध रहेको छ, पर्सा जिल्ला विभेद, हेला, अपमानका विरुद्ध न्याय र समानताको पक्षमा लड्दै आएको छ, जनतालाई केही नेताहरुले अल्मल्याएर आफ्नो दुनो सोभ्mयाए तर पर्सा जिल्ला अब भ्रमबाट मुक्त भएको छ भन्दै आफ्नो पार्टीको उद्देश्य, विचार र पुग्न खोजेको ठाउँ, बाटोबारे जानकारी दिन पर्सामा आएको बताए । उनले सिंगै नेपाललाई समृद्ध नेपाल र सुखी नेपाल बनाउने नेकपा एमालेको मुख्य एजेण्डा रहेको बताए ।
आफ्नो पार्टी सरकारमा भएको बेला शिक्षा, स्वास्थ्य तथा वृद्धवृद्धाहरुको सामाजिक सुरक्षा भत्ता लगायतको कार्यहरु गरेको बताए । उनले बालबालिकालाई विद्यालयमा अनियार्व भर्ना, कापी किताबको व्यवस्था, गरिब र लक्षित समूहलाई खाजाको प्रबन्ध गरेर शिक्षाप्रति आकर्षण गराउने, अशक्त व्यक्ति, जेष्ठ नागरिकहरुको जीवन निर्वाह गराउने सामाजिक सुरक्षा भत्ताको व्यवस्था गर्न नेकपा एमालेको योगदान रहेको दाबी गर्दै जेष्ठ नागरिकहरुको लागि १ लाखसम्मको स्वास्थ्यवीमाको समेत व्यवस्था मिलाएको बताए ।
कार्यक्रममा वीरगन्ज महानगरपालिकाका मेयर विजय सरावगीले मधेशवादी नेताहरुले मधेशको नाममा राजनीति गर्ने कार्य बन्द गर्नुपर्ने बताए । उनले मधेश आन्दोलनको क्रममा भएका घटनाहरु सबै जनतालाई थाहा छ, आन्दोलन चलि रहेको बेला तेल बेचेर आफ्नो गोजी भरेका ति मधेशवादी नेताहरुमाथि मधेशी जनताले विश्वास गर्न छाडेको बताए । बारम्बार मधेशको नाममा राजनीति गर्नेहरुले अब बुझ्नुपर्यो, व्यापारीहरुलाई गाली गर्न छाडिदिनुपर्यो भन्दै मेयर सरावगीले त्यही व्यापारीसँग चन्दा लिएर राजनीति गर्नेहरुले व्यापारीहरुलाई गाली गर्न छाड्नुपर्ने बताए ।
कार्यक्रममा विभिन्न पार्टीबाट विजय भएका तीनजना उपप्रमुख नेकपा एमालेमा प्रवेश गरेका थिए । बहुदरमाई नगरपालिका, सखुवाप्रसौनी गाउँपालिका र धोबीनी गाउँपालिकाका उपप्रमुखले विभिन्न पार्टी परित्याग गरि एमालेमा प्रवेश गरेका हुन् । उनका साथै १५ सय भन्दा बढि कार्यकर्ताहरु पार्टी प्रवेश गरेका थिए । नवप्रवेशीलाई एमाले अध्यक्ष केपी ओलीले अबिर तथा माला लगाएर स्वागत गरेका थिए ।
प्रतिक्रिया दिनुहोस् !