खानेपानीको विषयमा विवाद हुँदा खुकुरी प्रहार, दुईजना घाइते

वीरगन्ज / खानेपानी धाराको विषयलाई लिएर वीरगन्ज महानगरपालिकामा विवाद भई गरिएको खुकुरी प्रहारबाट दुईजना घाइते भएका छन् । घाइते हुनेहरुमा वीरगन्ज महानगरपालिका वडा नं. २१ पटेलनगर बस्ने ४५ वर्षीय राजेन्द्र पटेल र उनका २० वर्षीय छोरा विकास पटेल रहेका छन् ।
खानेपानी धाराको विषयलाई लिएर मंगलबार बिहान विवाद हुँदा आफ्नै भाइ कामेश्वर पटेलले उनलाई खुकुरी प्रहर गरेको जिल्ला प्रहरी कार्यालय पर्साले जनाएको छ । खुकुरी प्रहारबाट राजेन्द्रको टाउकोमा गम्भिर चोट लागेको छ भने उपचारको क्रममा उनको टाउकोमा २० वटा टाँका लगाइएको छ । त्यस्तै विकासको हातमा चोट लाग्नुको साथै टाउकोमा ८ वटा टाँका लगाइएको प्रहरीले जनाएको छ । खुकुरी प्रहार गर्ने कामेश्वरलाई प्रहरीले पक्राउ गरिसकेको छ ।
कामेश्वरले प्रयोग गरेको खुकुरी समेत बरामद गरी उनी विरुद्ध ज्यान मार्ने कसुरमा अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक ओम प्रकाश खनालले जानकारी दिए ।