वीरगन्ज । नेपाल घरेलु तथा साना उद्योग महासंघको २५ औं राष्ट्रिय महाधिवेशन तथा केन्द्रिय महिला उद्यमी समितिको २२ औं राष्ट्रिय महिला उद्यमी सम्मेलन वीरगन्जमा हुने भएको छ । यही फागुन २६ र २७ गते वीरगन्ज स्थित टाउनहलमा हुने उक्त महाधिवेशन तथा सम्मेलनको उद्घाटन प्रधानमन्त्री शेर बहादुर देउवाले उद्घाटन गर्ने कार्यक्रम रहेको आयोजक सँस्थाले जनाएको छ ।
नेपाल घरेलु तथा साना उद्योग महासंघका केन्द्रिय अध्यक्ष श्याम प्रसाद गिरीले पत्रकार सम्मेलन गरि सम्मेलनको तयारीबारे जानकारी गराएका छन् । उनले महासंघकै इतिहासमा पहिलो पटक काठमाडौं बाहिर महासंघको अधिवेशन गर्न लागिएको भन्दै यो महाधिवेशनमा लघु घरेलु तथा साना उद्योग र महिला उद्यमशीलताको क्षेत्रमा सुधार गर्नुपर्ने र स्थापित गर्नुपर्ने सकारात्मक सन्देश नीति नियम र कानूनहरुकोे बारेमा छलफल गरि ठोस निष्कर्षमा पुग्ने योजना रहेको बताए । यस महाधिवेशनबाट ३ वटै तहका सरकारले लघु घरेलु तथा साना उद्योगको क्षेत्रमा अवलम्बन गर्नुपर्ने सुधारका कार्यक्रमहरु र नीतिगत सुधारका विषयमा सरकारको ध्यानाकर्षण गराउने र सुधारका लागि पहल गर्ने नेतृत्व समेत चयन गरिने बताए ।
वीरगन्ज आफैमा नेपालकै आर्थिक राजधानीको रुपमा स्थापित रहेको र यस क्षेत्रमा रहेका महिला उद्यमीहरुलाई समेटेर उनीहरुले उत्पादन गरेका सामानहरुलाई बढि भन्दा बढि बजारीकरण गर्न सक्ने उद्देश्यले नै वीरगन्जमा यस सम्मेलनको आयोजना गर्न लागिएको भन्दै अध्यक्ष गिरीले यस अधिवेशनले नेपालमा उत्पादनमुलक सामानतर्फ महिला उद्यमीहरुलाई आकर्षित गर्ने विश्वास व्यक्त गरे । देशको निर्यात अवस्था एकदमै दयनीय छ, आयातको अवस्था बढि भएकोले खास गरेर तराईका महिलाहरुले घरमै बस्ने गरेकोले तिनीहरुले पनि केही गर्न सक्ने क्षमता हुँदा हुँदै पनि बाहिर निस्कन नसक्ने भएकोले त्यस्ता उद्यमीहरुलाई यस सम्मेलनले समेट्ने बताए ।
उनले गत वर्षसम्मको तथ्याँक अनुसार हालसम्म ४ लाख ९८ हजार लघु घरेलु तथा साना उद्योग दर्ता भएका र करिब २ लाख ६२ हजारले नवीकरण गरेको देखिन्छ । अहिले मुलुकमा क्रियाशील रहेका करिब २ लाख ७० हजारको हाराहारीमा रहेको उद्योगमा ८ हजारजति मझौला र ठूला उद्योग रहेको हुँदा ९५ प्रतिशत भन्दा बढि उद्योगहरु लघु घरेलु तथा साना उद्योगहरु रहेका छन् जानकारी दिदै अध्यक्ष गिरीले यस्ता उद्योगले अर्थतन्त्रमा कुल ग्राहस्थ उत्पादनको ६ प्रतिशत जति अँश योगदान गरि रहेको बताए । यो बाहेक झण्डै ५ लाख परिवार अनौपचारिक रुपमा लघु उद्यम व्यावसायमा संलग्न रहेको भन्दै झण्डै २७ लाख जनशक्तिलाई रोजगारी उपलब्ध गराई रहेको यस क्षेत्रले मुलुकको निर्यातको ६० प्रतिशत भन्दा बढि अँशमा योगदान पु¥याई रहेको बताए ।
यति हुँदा हुँदै पनि यो क्ष्ोत्र अझैपनि उपेक्षित रहि आएको छ । वर्तमान संघीय संरचनामा मुलुक प्रवेश गरेपछि यो क्षेत्र र सरकारका ३ तहका बीच दुरी घट्नुको साटो अझ बढि रहेको भन्दै अध्यक्ष गिरीले यस्तो अवस्थामा महासंघको २५ औं राष्ट्रिय महाधिवेशन र २२ औं केन्द्रिय महिला उद्यमी सम्मेलन आयोजना गर्न लागिएको बताए । २०४७ सालमा स्थापना भएको यस लघु घरेलु तथा साना उद्योग महासंघ अन्तर्गत झण्डै ४० हजार लघु घरेलु तथा साना उद्योगीहरु आबद्ध छन् भने करिब १२ हजार महिला उद्यमीहरु महिला उद्यमी सञ्जालसँग आबद्ध रहेका छन् ।
प्रतिक्रिया दिनुहोस् !