यमुनामाई (रौतहट), २१ कात्तिक । रौतहटको यमुनामाई गाउँपालिका पछिल्लो समय आन्तरिक विवाद, जनप्रतिनिधिबीचको असमझदारी र प्रशासनिक निष्क्रियताका कारण अस्तव्यस्त बन्दै गएको छ । गाउँपालिकाभित्र जनप्रतिनिधिबीच देखिएको विवादलाई समाधान गर्नुको सट्टा प्रमुख प्रशासकीय अधिकृत बृजनन्दन साहले नै विवाद थप चर्काउने भूमिका खेलेको आरोप लागेको छ ।
गाउँपालिका वडा नं. ४ का वडाध्यक्ष चेतन राय यादवले प्रमुख प्रशासकीय अधिकृत साहमाथि निर्वाचित जनप्रतिनिधिबीच आपसी मनमुटाव सिर्जना गरी एकअर्कालाई प्रतिस्पर्धी बनाउने र गाउँपालिकाको प्रशासनिक तथा विकास निर्माणको काम प्रभावित पार्ने गरेको गम्भीर आरोप लगाएका छन् ।
वडाध्यक्ष यादवका अनुसार गाउँपालिका सञ्चालनमा जनप्रतिनिधि र प्रमुख प्रशासकीय अधिकृत दुवैको महत्वपूर्ण भूमिका हुन्छ । जनप्रतिनिधिले जनताको आवश्यकता र विकासका योजनालाई प्राथमिकता दिनुपर्ने हुन्छ भने प्रशासनिक नेतृत्वले कानुनी प्रक्रिया र पारदर्शी कार्यान्वयनमा सहयोग गर्नुपर्ने हुन्छ । तर प्रमुख प्रशासकीय अधिकृतले आफ्नो भूमिका निर्वाह गर्नुको सट्टा विवाद बढाएको उनको भनाइ छ ।
६ महिनादेखि गाउँसभा ठप्प
गाउँपालिकामा विगत ६ महिनादेखि गाउँसभा बस्न नसक्दा बजेट, योजना, विकास निर्माण, कर्मचारीको तलब भुक्तानी र नागरिकले पाउने दैनिक सेवा समेत प्रभावित भएको स्थानीयको गुनासो छ । गाउँसभा नहुँदा नयाँ योजना स्वीकृत हुन सकेका छैनन् भने पुराना योजना पनि अलपत्र परेका छन् ।
स्थानीयले पालिकाको अस्तव्यस्त अवस्थाका कारण जन्मदर्ता, सिफारिस, सामाजिक सुरक्षा भत्ता र विकास निर्माणका काममा समेत ढिलाइ भइरहेको बताएका छन् ।
छानबिन र समाधानको माग
वडाध्यक्ष यादवले प्रमुख प्रशासकीय अधिकृतको कार्यशैलीमाथि उच्च निकायले छानबिन गरी गाउँपालिकालाई सहज रूपमा सञ्चालन गर्ने वातावरण बनाउनुपर्ने माग गरेका छन् । जनप्रतिनिधिबीचको विवाद समाधान गरी गाउँसभा तत्काल बोलाउनुपर्ने उनको माग छ ।
यस विषयमा प्रमुख प्रशासकीय अधिकृत बृजनन्दन साहसँग प्रतिक्रिया लिन खोज्दा सम्पर्क हुन सकेन । प्रतिक्रिया प्राप्त भएपछि समाचारमा समावेश गरिनेछ । 
प्रतिक्रिया दिनुहोस् !