सोनमा (महोत्तरी), १९ कात्तिक । महोत्तरीको सोनमा गाउँपालिकाका तत्कालीन प्रमुख प्रशासकीय अधिकृत श्रीदेव यादव घुस लिएको कसुरमा दोषी ठहर भएका छन् । विशेष अदालतले बुधबार यादवलाई भ्रष्टाचारसम्बन्धी मुद्दामा दोषी ठहर गरेको हो । उनी एक उपभोक्ता समिति अध्यक्षसँग ७२ हजार रुपैयाँ घुस लिइरहेको अवस्थामा पक्राउ परेका थिए ।
अख्तियार दुरुपयोग अनुसन्धान आयोगको बर्दिबास कार्यालयबाट खटिएको टोलीले यादवलाई महोत्तरीको औरही सडकबाट घुस रकमसहित नियन्त्रणमा लिएको थियो । गोलबजार नगरपालिका–१२, सिमरा घर भएका यादव कल्याणपुर नगरपालिकाबाट सरुवा भएर सोनमा गाउँपालिकाको प्रमुख प्रशासकीय अधिकृतका रूपमा कार्यरत थिए ।
सोनमा गाउँपालिकामा जिम्मेवारी सम्हालेको केही दिनमै उनी घुस रकमसहित अख्तियारको नियन्त्रणमा परेका थिए । उपभोक्ता समिति अध्यक्षसँग घुस लिएको आरोपमा पक्राउ परेका यादवलाई विशेष अदालतले दोषी ठहर गरेको हो । 
प्रतिक्रिया दिनुहोस् !