गरुडा (रौतहट), ६ कात्तिक । आम जनता पार्टी (आजपा) का अध्यक्ष तथा पूर्वमन्त्री प्रभु साहले प्रधानमन्त्री बालेन्द्र शाहलाई असफल बनाउने खेल राष्ट्रिय स्वतन्त्र पार्टी (रास्वपा) भित्रैबाट भइरहेको आरोप लगाएका छन् । सरकार गठन भएको ६ महिना नपुग्दै प्रधानमन्त्री शाहलाई विस्थापित गर्ने रणनीति बनाइएको दाबी गर्दै साहले सरकारका लागि बाहिरी दलभन्दा आफ्नै पार्टीभित्रको शक्ति संघर्ष ठूलो चुनौती बन्न सक्ने टिप्पणी गरेका हुन् ।
शुक्रबार रौतहटको गरुडामा अग्रगामी मोर्चाको नगर कमिटीद्वारा आयोजित शुभकामना विशेष कार्यक्रमलाई सम्बोधन गर्दै साहले रास्वपाको कोर टिमले प्रधानमन्त्री शाहलाई असफल बनाउने योजनाबद्ध प्रयास गरिरहेको आरोप लगाए । उनका अनुसार रास्वपाभित्रको आन्तरिक शक्ति संघर्षले प्रधानमन्त्रीको कार्यसम्पादनमा असर पार्न सक्नेछ । यस्तो राजनीतिक खेलबारे जनताले छिट्टै वास्तविकता थाहा पाउने दाबीसमेत उनले गरे ।
साहले रास्वपा सभापति रवि लामिछाने, अर्थमन्त्री स्वर्णिम वाग्ले र पूर्वउपसभापति तथा वर्तमान सभामुख डीपी अर्यालबीच प्रधानमन्त्री शाहलाई कमजोर बनाउने उद्देश्यले मोर्चाबन्दी भएको आरोप लगाए । यद्यपि, उनले लगाएका यी आरोपबारे सम्बन्धित नेताहरूको प्रतिक्रिया समाचारमा समेटिएको छैन ।
रास्वपाका शीर्ष नेताहरूको विदेश भ्रमणलाई समेत साहले शंकाको दृष्टिले हेर्नुपर्ने बताए । लामिछानेको यसअघिको भारत भ्रमण, चीन भ्रमणको तयारी तथा हालै धार्मिक यात्राका लागि भारत गएको प्रसंग उठाउँदै उनले नेताहरूको लगातारको विदेश भ्रमणलाई सामान्य रूपमा लिन नहुने टिप्पणी गरे । अर्थमन्त्री वाग्ले पनि भारत भ्रमणमा रहेको उल्लेख गर्दै साहले यस विषयमा प्रश्न उठाएका हुन् ।
पूर्वमन्त्री साहले रास्वपाको कोर टिमले प्रधानमन्त्री शाहलाई आसन्न स्थानीय तहको निर्वाचनसम्म मात्रै उपयोग गर्न खोजेको आरोपसमेत लगाए । उनका अनुसार रास्वपाको प्राथमिकता देश र जनताको समस्या समाधान गर्नु नभई चुनाव जित्ने र सत्ता प्राप्त गर्ने रणनीतिमा केन्द्रित छ ।
कार्यक्रममा साहले रास्वपाको चुनाव र सत्ताकेन्द्रित राजनीतिमाथि प्रहार गर्दै भने, “घण्टीहरूलाई कुर्सीको मात्रै चिन्ता छ, चुनाव कसरी जित्ने, कसरी पद पाउने भन्ने मात्रै चिन्ता देखियो । देश र जनताको बारेमा यिनीहरूलाई कुनै चिन्ता छैन । यस्तो अवसरवादी सोच भएकाहरूबाट सचेत हुनुपर्छ ।” उनले रास्वपा सभापति लामिछानेका समर्थक कार्यकर्ताहरू सामाजिक सञ्जालमा उग्र रूपमा प्रस्तुत हुने गरेको आरोप पनि लगाए । सामाजिक सञ्जालमा हुने गालीगलौजले सामाजिक वातावरण दूषित बनाएको भन्दै साहले यस्तो प्रवृत्तिप्रति असन्तुष्टि व्यक्त गरे । 
प्रतिक्रिया दिनुहोस् !