वीरगंज (पर्सा), १५ असोज । पर्साका चार गाउँपालिकाले नयाँ प्रमुख प्रशासकीय अधिकृत पाएका छन् । पटेर्वा सुगौली, धोबिनी, छिपहरमाई र पकाहाँमैनपुर गाउँपालिकामा नयाँ प्रमुख प्रशासकीय अधिकृतले हाजिर भई प्रशासनिक जिम्मेवारी सम्हालेका हुन् । पटेर्वा सुगौली गाउँपालिकामा महमद नवाज हुसैन, धोबिनी गाउँपालिकामा सञ्जीव कुमार यादव, छिपहरमाई गाउँपालिकामा सर्वजीत कुमार झा र पकाहाँमैनपुर गाउँपालिकामा सुमित कुमार सिंहले पदभार ग्रहण गरेका छन् ।
नयाँ प्रमुख प्रशासकीय अधिकृतहरूलाई सम्बन्धित गाउँपालिकाका जनप्रतिनिधि तथा कर्मचारीहरूले स्वागत गरेका छन् । स्वागत तथा परिचयात्मक कार्यक्रममा उनीहरूलाई फूलमाला, अबिर र गमछा ओढाएर कार्यकाल सफलताको शुभकामना दिइएको थियो । पदभार सम्हालेसँगै चारै पालिकाका प्रमुख प्रशासकीय अधिकृतहरूले नागरिकलाई प्रभावकारी र गुणस्तरीय सेवा उपलब्ध गराउने विषयलाई प्राथमिकतामा राख्ने बताएका छन् । प्रशासनिक कामलाई थप व्यवस्थित बनाउँदै सेवाग्राहीलाई सहज, सरल तथा छिटोछरितो सेवा प्रवाह गर्ने उनीहरूले प्रतिबद्धता जनाएका छन् ।
स्थानीय तहमा विकास निर्माणका काम, योजना कार्यान्वयन, सुशासन र पारदर्शितालाई प्रभावकारी बनाउनेतर्फ पनि ध्यान केन्द्रित गर्ने उनीहरूको भनाइ छ । साथै जनप्रतिनिधि, कर्मचारी र स्थानीय समुदायबीचको समन्वय तथा सहकार्यलाई मजबुत बनाउँदै पालिकाको सेवा प्रवाह र प्रशासनिक कार्यलाई थप प्रभावकारी बनाउने प्रतिबद्धता उनीहरूले व्यक्त गरेका छन् । 
प्रतिक्रिया दिनुहोस् !