वीरगंज (पर्सा), १४ असोज । वीरगंज महानगरपालिकाका मेयर राजेशमान सिंहले घण्टाघरनजिक निर्माणाधीन बीपी पार्क यही आर्थिक वर्षभित्र सञ्चालनमा ल्याउने घोषणा गरेका छन् । महानगरपालिकाको २१औँ विशेष नगरसभामा चालू आर्थिक वर्षको संशोधित बजेट प्रस्तुत गर्दै उनले पार्कलाई व्यवस्थित, सुरक्षित र पर्यटकीय आकर्षणको केन्द्रका रूपमा विकास गरेर सञ्चालनमा ल्याइने बताएका हुन् ।
मेयर सिंहका अनुसार निर्माणाधीन बीपी उद्यानमा वाक–वे, बाल उद्यान, ज्येष्ठ नागरिकका लागि विश्राम केन्द्र तथा पर्याप्त हरियाली विस्तार गरिनेछ । पार्कलाई सुरक्षित र प्रविधिमैत्री बनाउँदै वीरगंजको प्रमुख आकर्षणका रूपमा विकास गर्ने महानगरको योजना रहेको उनले बताए । नगरवासीको आवागमन सहज बनाउन निजी क्षेत्रसँग सहकार्य गरेर वीरगंज महानगर क्षेत्रमा नगर बस सेवा सञ्चालन गर्ने तयारीसमेत रहेको सिंहले जानकारी दिए ।
त्यसैगरी, महानगरलाई रातिको समयमा समेत सुरक्षित र आकर्षक बनाउने उद्देश्यले सञ्चालन हुँदै आएको ‘उज्यालो वीरगंज’ अभियानलाई थप प्रभावकारी बनाइने उनले बताए । मुख्य सडक, चोक तथा भित्री बस्तीमा स्मार्ट एलइडी र हाइमास्ट बत्ती थप जडान गर्दै महानगरको कुनै पनि क्षेत्र अन्धकारमा नरहने गरी काम अघि बढाइने उनको भनाइ छ ।
वीरगंजलाई स्वच्छ, हरित, सभ्य र जीवन्त शहरका रूपमा विकास गर्न ‘स्वच्छ, हरित र वैभव वीरगंज’ अभियान सञ्चालन गर्ने योजना पनि महानगरले अघि सारेको छ । यसअन्तर्गत सडक कोरिडोर तथा डिभाइडरमा हरियाली विस्तार, खुला स्थानमा वातावरणमैत्री पार्क निर्माण, अव्यवस्थित तार तथा होर्डिङ बोर्डको वैज्ञानिक व्यवस्थापन र ऐतिहासिक सम्पदा तथा पोखरीहरूको सौन्दर्यीकरण गरिने मेयर सिंहले बताए ।
शैक्षिक क्षेत्रको सुधारका लागि सार्वजनिक विद्यालयमा रहेको दरबन्दी संरचना, विद्यार्थी संख्या र उपलब्ध भौतिक पूर्वाधारबीच आवश्यक तादम्यता कायम गर्ने नीति लिइने उनले जानकारी दिए । महानगरले स्थानीय भाषा, कला, साहित्य र संस्कृतिको संरक्षणलाई समेत प्राथमिकतामा राख्ने जनाएको छ । भोजपुरी भाषा, संस्कृति, साहित्य तथा कलाको संरक्षण र प्रवद्र्धनका लागि भोजपुरी प्रतिष्ठानसहित सम्बन्धित क्षेत्रका विभिन्न संस्था तथा व्यक्तिको सक्रियतामा प्रवद्र्धनात्मक कार्यक्रम सञ्चालन गरिने सिंहले बताए ।
नगरवासीको शारीरिक, मानसिक तथा सामाजिक स्वास्थ्यलाई लक्षित गर्दै आधारभूत स्वास्थ्य केन्द्र, योग शिविर, ध्यान केन्द्र, आरोग्य केन्द्र, खुला व्यायामशाला तथा मनोरञ्जन स्थल र पार्कलाई थप व्यवस्थित र प्रभावकारी बनाउने योजना पनि महानगरले अघि सारेको छ । 
प्रतिक्रिया दिनुहोस् !