वीरगंज (पर्सा), ११ असोज । नेपाली कांग्रेस पर्साको प्रतिनिधिसभा क्षेत्र नम्बर ४ को क्षेत्रीय सभापतिमा श्रीकान्त प्रसाद यादव पुनः सर्वसम्मत चयन भएका छन् । जगरनाथपुर गाउँपालिका–५ मसिहानीमा आइतबार सम्पन्न कांग्रेसको क्षेत्रीय अधिवेशनले यादवलाई दोस्रोपटक क्षेत्रीय सभापतिको जिम्मेवारी दिएको हो । यादव जगरनाथपुर गाउँपालिकाका अध्यक्षसमेत हुन् ।
अधिवेशनबाट क्षेत्रीय सचिवमा बलिष्टर अहमद र सहसचिवमा सन्जय चौधरी पनि पुनः सर्वसम्मत चयन भएका छन् । कांग्रेसको १५औँ महाधिवेशनका लागि क्षेत्र नम्बर ४ बाट महाधिवेशन प्रतिनिधिमा पूर्वउद्योगमन्त्री रमेश रिजाल, मधेश प्रदेश सरकारका वनमन्त्री शंकर चौधरी, कांग्रेस पर्साका जिल्ला सहसचिव नविन सिंह, तबरेज अहमद, सहरुम राउत गदी, किशोरी प्रसाद कानु, पञ्चानन्द मिश्र, रेखा चौधरी, गोमा उपाध्याय, गीता विष्ट र शोभा शर्मा सर्वसम्मत चयन भएका छन् ।
नवनिर्वाचित क्षेत्रीय सचिव बलिष्टर अहमदका अनुसार अधिवेशनले क्षेत्र नम्बर ४ को ‘क’ प्रदेशसभा निर्वाचन क्षेत्रको नेतृत्व पनि सर्वसम्मत चयन गरेको छ । जसअनुसार क्षेत्रीय सभापतिमा जीवनकृष्ण सापकोटा, उपसभापतिमा मनमोहन महतो थारु, सचिवमा मुकेश महतो तथा सहसचिवमा ललिता देवी र सेवालाल महतो कोइरी चयन भएका छन् ।
सोही प्रदेशसभा निर्वाचन क्षेत्रबाट प्रदेश अधिवेशन प्रतिनिधिमा नवराज फुयाँल, नेपाली प्रसाद कुशवाहा, अफताब मियाँ, दीपेन्द्र चौहान, अनोज चौधरी, सुरेन्द्र महतो, केशव खड्का, रुना माझी र बबीता सिंह क्षेत्रीसहित २४ जना सर्वसम्मत निर्वाचित भएका छन् । निवर्तमान क्षेत्रीय सभापति श्रीकान्त यादवको अध्यक्षता तथा पूर्वमन्त्री रमेश रिजालको प्रमुख आतिथ्यतामा अधिवेशन सम्पन्न भएको सचिव अहमदले जानकारी दिए । 
प्रतिक्रिया दिनुहोस् !