वीरगंज (पर्सा), ११ असोज । वीरगंज महानगरपालिकाका मेयर राजेशमान सिंहले पूर्वप्रधानन्यायाधीश चोलेन्द्र शम्शेर राणा पक्राउ प्रकरणमा आफ्नो नाम जोडेर प्रकाशित समाचारप्रति आपत्ति जनाएका छन् । राणा पक्राउसम्बन्धी समाचारमा आफूलाई असम्बन्धित रूपमा जोडेर भ्रमपूर्ण तथा प्रतिष्ठामा आँच पुग्ने सामग्री प्रकाशन गरिएको भन्दै मेयर सिंहले आपत्ति जनाएका हुन् । पूर्वप्रधानन्यायाधीश राणा पक्राउ परेको विषय अहिले सार्वजनिक चर्चामा रहेको छ भने प्रहरीका अनुसार उनलाई सुरक्षा चुनौतीका कारण नियन्त्रणमा लिइएको बताइएको छ ।
मेयर सिंहका स्वकीय सचिव सत्यराज घिमिरेले आइतबार विज्ञप्ति जारी गर्दै केही अनलाइन सञ्चारमाध्यमले राणा पक्राउ प्रकरणसँग मेयर सिंहको नाम जोडेर प्रकाशित गरेको समाचारप्रति गम्भीर ध्यानाकर्षण भएको जनाएका छन् । विज्ञप्तिमा राणा स्वयंको पक्राउको कारणसमेत स्पष्ट रूपमा सार्वजनिक नभइसकेको अवस्थामा घटनासँग असम्बन्धित व्यक्तिलाई जबर्जस्ती जोडेर विवादमा तान्नु र सार्वजनिक प्रतिष्ठामा असर पार्ने सामग्री प्रकाशन गर्नु दुःखद भएको उल्लेख गरिएको छ ।
घिमिरेले प्रेस तथा अभिव्यक्ति स्वतन्त्रताको सम्मान गर्ने जनाउँदै कुनै व्यक्तिको सार्वजनिक छवि र प्रतिष्ठामा असर पर्ने गरी असम्बन्धित विषयसँग नाम जोडेर समाचार प्रकाशन गर्नु स्वीकार्य नहुने बताएका छन् । उनले समाचार प्रकाशनपूर्व तथ्य र सन्दर्भको पूर्ण पुष्टि गर्न सम्बन्धित सञ्चारमाध्यमलाई आग्रह गरेका छन् ।
नागरिकता मुद्दाको प्रसंग जोडेर आपत्ति
विज्ञप्तिमा मेयर सिंहको नाम राणा पक्राउ प्रकरणसँग जोडिनुको आधारका रूपमा वीरगंज महानगरको मेयरमा निर्वाचित हुनुअघिको नागरिकता सेवासम्बन्धी विवादलाई प्रस्तुत गरिएकोप्रति समेत आपत्ति जनाइएको छ । घिमिरेका अनुसार नेपाल सरकारको सेवाग्राहीका रूपमा राजेशमान सिंहले नागरिकतासम्बन्धी सेवा लिएको विषयमा अख्तियार दुरुपयोग अनुसन्धान आयोगले आफ्नो क्षेत्राधिकारभन्दा बाहिर गएर संविधान तथा कानुनविपरीत भ्रष्टाचार मुद्दा अघि बढाएको दाबी गरिएको छ ।
उक्त विषयमा पर्सा जिल्ला अदालतमा मुद्दा विचाराधीन रहेकै अवस्थामा विशेष अदालतमा आरोपपत्र दायर भएको भन्दै दोहोरो कारबाहीको सिद्धान्तविपरीत भएको जिकिरसहित सर्वोच्च अदालतमा रिट दायर गरिएको विज्ञप्तिमा उल्लेख छ । तर सर्वोच्च अदालतले रिट खारेज गरेपछि न्यायिक प्रक्रियालाई सम्मान गर्दै विशेष अदालतको प्रक्रिया अघि बढाइएको र अन्ततः विशेष अदालतबाट सफाइ पाएपछि सिंह वीरगंज महानगरपालिकाको नेतृत्वमा फर्किएको विज्ञप्तिमा दाबी गरिएको छ ।
यही न्यायिक प्रक्रियाबाट टुंगिएको विषयलाई पूर्वप्रधानन्यायाधीश राणा पक्राउ प्रकरणसँग जोडेर प्रस्तुत गर्नु तथ्य र सन्दर्भलाई विकृत गर्ने प्रयास भएको मेयर सिंहको सचिवालयको भनाइ छ ।
खण्डन प्रकाशन गर्न आग्रह, कानुनी प्रक्रियाको चेतावनी
मेयर सिंहका स्वकीय सचिव घिमिरेले सम्बन्धित सञ्चारमाध्यमलाई प्रकाशित सामग्रीको खण्डन प्रकाशन गर्न आग्रह गरेका छन् । खण्डन प्रकाशन नगरिए प्रचलित कानुन तथा पत्रकारिता आचारसंहिताअनुसार प्रेस काउन्सिल नेपाललगायत सम्बन्धित निकायमा आवश्यक कानुनी प्रक्रिया अघि बढाउन बाध्य हुने चेतावनीसमेत विज्ञप्तिमार्फत दिइएको छ ।
यसैबीच, पूर्वप्रधानन्यायाधीश राणालाई काठमाडौंस्थित निवासबाट प्रहरीले नियन्त्रणमा लिएको घटनाको कानुनी आधार र पक्राउको कारणबारे सार्वजनिक रूपमा विभिन्न विवरण आएका छन् । प्रहरी पक्षले सुरक्षा चुनौतीका कारण उनलाई कार्यालयमा ल्याइएको बताएको छ भने पक्राउको विषयमा थप विवरण सार्वजनिक हुने क्रममा रहेको छ । 
प्रतिक्रिया दिनुहोस् !