तिलाठी कोइलाडी (सप्तरी), १० असोज । कोशी नदीको पानी बस्तीमा पस्दा सप्तरीको तिलाठी कोइलाडी गाउँपालिका–४ र ५ का १७ घरपरिवार प्रभावित भएका छन् । घरभित्र पानी पसेपछि प्रभावित परिवार सुरक्षित स्थानको खोजीमा अग्लो कोशी बाँधमा आश्रय लिन बाध्य भएका छन् । प्रभावित परिवारमध्ये चार जना सुत्केरी महिला रहेको गाउँपालिकाले जनाएको छ ।
घरमा पानी पसेपछि सुत्केरीसहित प्रभावित परिवारलाई तत्कालका लागि अग्लो स्थानमा सारिएको गाउँपालिकाका विपद् व्यवस्थापन अधिकृत राजेशकुमार झाले जानकारी दिए । उनका अनुसार वडा नम्बर ४ को टिकुलिया खंग टोलमा बौवालाल खंग, हरिलाल खंग, बद्री खंग, रजिया देवी खंग, सुकराती खंग, चनाइ खंग, लक्ष्मण खंग, राजकुमार खंग, धर्मी खंग, जलेश्वर मुखिया र अखलेश मुखियाको घरमा नदीको पानी पसेको छ ।
त्यस्तै वडा नम्बर ५ मा भरत मण्डल, महेश साह, सियाराम मुखिया, गंगाराम मुखिया, मन्टुन मुखिया र बेचु मुखियाको घरसमेत डुबानमा परेको झाले बताए । बस्तीमा मात्र नभई तिलाठी कोइलाडी–४ स्थित सशस्त्र प्रहरीको टिकुलिया बेस क्याम्पसमेत कोशी नदीको पानीबाट प्रभावित भएको छ । बेस क्याम्पमा पानी पसेपछि सशस्त्र प्रहरी बल नेपाल मधेश प्रदेश बाहिनी मुख्यालय बर्दिबास, महोत्तरीका प्रमुख सशस्त्र प्रहरी नायब महानिरीक्षक (डीआईजी) विष्णुप्रसाद भट्टले स्थलगत निरीक्षण गरेका छन् ।
यसैबीच सप्तरीका प्रमुख जिल्ला अधिकारी श्यामकृष्ण थापाले कोशी नदीमा पानीको बहाव उच्च रहेकाले नदी आसपासका क्षेत्रमा पानीको सतह बढेको बताए । उनका अनुसार पछिल्लो समय भने नदीको पानी विस्तारै घट्ने क्रममा रहेको छ । नदीको पानी घट्न थाले पनि घरमा पसेको पानी र डुबानका कारण प्रभावित परिवारको जनजीवन प्रभावित भएको छ । विशेषगरी सुत्केरी महिलासहितका परिवारलाई सुरक्षित र सहज स्थानमा व्यवस्थापन गर्नु तत्कालको प्राथमिकता बनेको छ । 
प्रतिक्रिया दिनुहोस् !