वीरगंज (पर्सा), ७ असोज । सार्वजनिक तथा कृषि वन क्षेत्रको संरक्षण र सदुपयोग गर्ने उद्देश्यले पर्साको जगरनाथपुर गाउँपालिका–२ लक्ष्मीपुरस्थित फुलबारी टोलमा वृक्षरोपण अभियान सुरु गरिएको छ । स्थानीय व्यवस्थापन समूहको पहलमा करिब २० बिघा क्षेत्रफलमा विभिन्न प्रजातिका बिरुवा रोप्ने अभियान अघि बढाइएको हो ।
लामो समयदेखि उचित संरक्षण र उपयोगको अभावमा रहेको सार्वजनिक जग्गालाई व्यवस्थित गर्दै कृषि वनका रूपमा विकास गर्ने उद्देश्यले अभियान सञ्चालन गरिएको आयोजकले जनाएको छ । अभियानअन्तर्गत पहिलो चरणमा आँप, अम्बा, अमला, सगुवानलगायत विभिन्न प्रजातिका बिरुवा रोपिएको छ । वृक्षरोपण अभियानको उद्घाटन पर्सा क्षेत्र नं. ४ का पूर्वसांसद तथा पूर्वमन्त्री रमेश रिजालले बिरुवा रोपेर गरेका थिए ।
कार्यक्रममा मधेश प्रदेशसभा सदस्य शंकर चौधरी, जगरनाथपुर गाउँपालिकाका अध्यक्ष श्रीकान्त यादव, गादीमाई वन व्यवस्थापन समितिका अध्यक्ष सहरुम गदी, नेपाली कांग्रेस पर्साका कोषाध्यक्ष प्रेम थापालगायतको सहभागिता थियो । कार्यक्रममा सार्वजनिक जग्गाको संरक्षण, वातावरणीय सन्तुलन र स्थानीय क्षेत्रमा हरियाली विस्तारका विषयमा वक्ताहरूले जोड दिएका थिए । सार्वजनिक क्षेत्रलाई अतिक्रमण तथा अव्यवस्थित प्रयोगबाट जोगाउँदै कृषि वनको रूपमा विकास गर्न सके वातावरण संरक्षणसँगै स्थानीय समुदायलाई समेत दीर्घकालीन लाभ पुग्ने उनीहरूको भनाइ थियो ।
व्यवस्थापन समूहका अनुसार संरक्षणको अभावमा रहेको सार्वजनिक जग्गालाई व्यवस्थित उपयोगमा ल्याउँदै वृक्षरोपणमार्फत हरित क्षेत्र विस्तार गर्ने योजना बनाइएको हो । करिब २० बिघा क्षेत्रमा वृक्षरोपण पूरा भएपछि लक्ष्मीपुरको फुलबारी टोलमा हरियाली क्षेत्र विस्तार हुनुका साथै सार्वजनिक जग्गाको संरक्षणमा समेत टेवा पुग्ने अपेक्षा गरिएको छ ।
रोपिएका बिरुवाको संरक्षण, सिँचाइ तथा हुर्काउने जिम्मेवारी व्यवस्थापन समूह र स्थानीय समुदायको सहकार्यमा अघि बढाइने जनाइएको छ । सार्वजनिक जग्गा संरक्षणसँगै कृषि वनको विकास र वातावरणीय संरक्षणलाई प्राथमिकतामा राखेर अभियानलाई निरन्तरता दिने आयोजकको भनाइ छ । कार्यक्रममा जगरनाथपुर गाउँपालिकाका प्रमुख प्रशासकीय अधिकृत सन्देश यादव, वडा अध्यक्ष नेपाली कुशवाहा, लक्ष्मी साह तेली, बिहारी महतो नुनियालगायत स्थानीयवासीको सहभागिता रहेको थियो ।
प्रतिक्रिया दिनुहोस् !