गौर (रौतहट), ७ असोज । असोज ८ गतेदेखि केही दिन लगातार भारी वर्षा हुन सक्ने मौसम पूर्वानुमानपछि रौतहटमा उच्च सतर्कता अपनाइएको छ । सम्भावित वर्षासँगै बाढी, डुबान तथा अन्य विपद्को जोखिम बढ्न सक्ने भन्दै जिल्ला प्रशासन कार्यालयले जिल्लावासीलाई पूर्वतयारी अवस्थामा रहन आग्रह गरेको हो । नेपाल मौसम विज्ञान विभागको प्रक्षेपणलाई आधार बनाउँदै प्रमुख जिल्ला अधिकारी (सिडिओ) लक्ष्मी प्रसाद पौडेलले बुधबार सार्वजनिक सूचना जारी गर्दै सम्भावित विपद्बाट जोगिन समयमै आवश्यक सावधानी अपनाउन नागरिकलाई आग्रह गरेका छन् ।
प्रशासनले विशेषगरी नदी तथा खोलाको तटीय क्षेत्रमा बसोबास गर्ने र अन्य जोखिमयुक्त स्थानमा रहेका नागरिकलाई सम्भावित जोखिम बढ्नुअघि नै सुरक्षित स्थानतर्फ सर्न अनुरोध गरेको छ । स्थानान्तरणका क्रममा समस्या भए सम्बन्धित स्थानीय तह वा नजिकको सुरक्षा निकायसँग समन्वय गर्न प्रशासनले भनेको छ । भारी वर्षाको सम्भावनालाई ध्यानमा राख्दै रातको समयमा अत्यावश्यक कामबाहेक लामो दूरीको यात्रा नगर्नसमेत प्रशासनले आग्रह गरेको छ । यात्रा गर्नैपर्ने भए सम्बन्धित स्थानीय तह तथा सुरक्षा निकायसँग सडकको अवस्था र सम्भावित जोखिमबारे जानकारी लिएर मात्र यात्रा गर्न भनिएको छ ।
यात्राका क्रममा सडक वा बाटो जोखिमपूर्ण देखिए गन्तव्यमा पुग्न हतार नगरी आफू रहेको स्थान आसपासकै सुरक्षित ठाउँमा रोकिएर अवस्था सामान्य भएपछि मात्र अघि बढ्न प्रशासनले सुझाव दिएको छ । प्रशासनले यात्रामा निस्कनुअघि आवश्यक तयारी गर्नसमेत आग्रह गरेको छ । अतिरिक्त कपडा, ड्राइफुड, खानेपानी, मोबाइल चार्जर तथा प्राथमिक उपचारका आवश्यक औषधि साथमा राख्न र मोबाइल पर्याप्त चार्ज गरेर मात्र यात्रा गर्न भनिएको छ । सम्भावित विपद्को अवस्थामा वृद्धवृद्धा, अपाङ्गता भएका व्यक्ति, बिरामी तथा बालबालिकालाई पहिलो प्राथमिकतामा राखेर सुरक्षित स्थानमा स्थानान्तरण गर्ने गरी परिवार तथा समुदायस्तरमै पूर्वतयारी गर्न प्रशासनले अनुरोध गरेको छ ।
त्यसैगरी, माथिल्लो भेगमा नदी तथा खोलाको अवस्था र पानीको बहावबारे निरन्तर सूचना लिन प्रशासनले आग्रह गरेको छ । जोखिमको सूचना प्राप्त हुनासाथ उद्धार तथा सुरक्षाका आवश्यक कदम चाल्नसमेत स्थानीय प्रशासनले सम्बन्धित पक्षलाई सचेत गराएको छ ।
सिडिओ पौडेलले विपद् आएपछि उद्धारको प्रतीक्षा गर्नेभन्दा जोखिम आउनुअघि नै सुरक्षित हुने गरी तयारी गर्नुपर्नेमा जोड दिएका छन् । भारी वर्षाबाट उत्पन्न हुन सक्ने बाढी, डुबान तथा अन्य विपद्को जोखिमलाई मध्यनजर गर्दै नागरिकलाई उच्च सतर्कता अपनाउन उनले आग्रह गरेका हुन् ।
आपतकालीन अवस्थामा सम्पर्क
नेपाल प्रहरी : १००
सशस्त्र प्रहरी बल नेपाल : १११४
जिल्ला आपत्कालीन केन्द्र (डि.ई.ओ.सी.) : १२३४
जिल्ला प्रशासन कार्यालय, रौतहट : ९८५५०४७७७२
जिल्ला प्रहरी कार्यालय, रौतहट : ९८५५०४०६०७
महोत्तरीमा पनि पूर्वसतर्कता अपनाउन अपिल
यसैगरि जिल्ला प्रशासन कार्यालय महोत्तरीले पूर्वसचेतताका लागि सार्वजनिक अपिल गरेको छ । मौसम विज्ञान विभागको मौसम पूर्वानुमान महाशाखा, महोत्तरीले यही असोज ९ गते शुक्रबारदेखि तीन दिन मधेस मुलुकका विभिन्न भेगमा हावाहुरीसँगै मेघगर्जन हुने, चट्याङ पर्ने र भारी वर्षा हुने अनुमान प्रक्षेपण गरेसँगै प्रशासनले सर्वसाधारणलाई सुरक्षित रहन सार्वजनिक अपिल गरेको हो ।
पूर्वसचेतनाका लागि स्थानीय तह, रेडक्रससहितका सामाजिक सङ्घ संस्था, प्रहरी र आमनागरिक समाज सचेत रहे क्षति हुनबाट जोगिन सकिने हुँदा यो अपिल जारी गरिएको प्रमुख जिल्ला अधिकारी इन्द्रदेव यादवले बताए । जिल्लामा विपद्का बेला जनधनको क्षति भएको हामीसँग विगत अनुभव छ, त्यसबाट शिक्षा लिँदै अब सचेत रहन आवश्यक छ’, प्रजिअ यादवले सञ्चारकर्मीसँगको कुराकानीमा आज भन्नुभयो । जिल्लामा रातु, मडहा, बाँके, जङ्घा, बिग्ही र कुटमेश्वरीसहितका नदीको बाढी बस्तीमा पसेर डुबान गरेका घटना छन् ।
प्रतिक्रिया दिनुहोस् !