परवानीपुर (बारा), ४ असोज । लाङटाङ लिरुङ हिमाल क्षेत्रमा गएको हिम–चट्टान पहिरोपछि भोटेकोशी र त्रिशूली नदी प्रणालीमा आएको बाढीमा बेपत्ता भएका बाराको परवानीपुर गाउँपालिका–५, बहुअरी टोलका ३६ वर्षीय नमोनारायण पटेलको २३ दिनसम्म खोजी गर्दा पनि कुनै अत्तोपत्तो नलागेपछि परिवारले कुशको शव बनाएर अन्तिम संस्कार गरेको छ । बाढीमा जेठो छोरा बेपत्ता भएपछि बुवा प्रभु पटेलसहित परिवारका सदस्य, आफन्त र गाउँलेहरू घटनाकै दिनदेखि उनको खोजीमा जुटेका थिए ।
प्रहरी प्रशासन, स्थानीय तह तथा सम्भावित विभिन्न स्थानमा निरन्तर खोजतलास गरिए पनि नमोनारायण जीवित वा मृत अवस्थामा फेला पर्न सकेनन् । लामो समयसम्म खोजी गर्दा पनि कुनै सुराक नपाएपछि परिवारले हिन्दु धार्मिक तथा सामाजिक परम्पराअनुसार शनिबार कुशको प्रतीकात्मक शव तयार पारेर अन्तिम संस्कार गरेको हो । शवसमेत फेला नपरेको अवस्थामा छोराको अन्तिम संस्कार गर्नुपर्ने बाध्यताले परिवारलाई शोकसँगै गहिरो मानसिक पीडामा धकेलेको छ ।
छोराको प्रतीक्षामा बिते २३ दिन, अन्ततः कुशको शवमा दाहसंस्कार
नमोनारायणको अन्तिम संस्कारका क्रममा बहुअरी टोल शोकमा डुबेको थियो । आफन्त, छिमेकी तथा स्थानीयवासी भावुक बनेका थिए । बुवा प्रभु पटेलले जेठो छोरा यसरी बेपत्ता भएर अन्ततः कुशको शवमार्फत अन्तिम संस्कार गर्नुपर्ने अवस्था आउला भन्ने आफूले कहिल्यै नसोचेको बताए । २३ दिनसम्म छोरा फर्किने आशामा बसे पनि खोजीका क्रममा कुनै खबर नआएपछि भारी मनका साथ अन्तिम संस्कार गर्नुपरेको उनको भनाइ थियो ।
नमोनारायणका भाइ धरमेश पटेलले दाइको खोजीका लागि सम्भव भएसम्म सबै ठाउँमा पुगेर प्रयास गरिएको बताए । प्रहरी प्रशासनसँग समन्वय गर्नुका साथै बाढी प्रभावित विभिन्न क्षेत्र र सम्भावित स्थानमा पुगेर खोजतलास गरे पनि दाइको कुनै जानकारी प्राप्त हुन नसकेको उनले बताए । ‘२३ दिनदेखि दाइको खोजीमा हामीले धेरै ठाउँ धायौँ । प्रहरी प्रशासनसँग समन्वय गर्यौँ, स्थानीय निकायलाई जानकारी गरायौँ । घटनास्थलदेखि सम्भावित अन्य स्थानसम्म पुग्यौँ, तर दाइको कुनै खबर पाएनौँ,’ धरमेशले भने, ‘जीवित छन् कि छैनन् भन्ने पनि थाहा नपाई बस्नुपर्ने अवस्था भयो। अन्ततः हिन्दु रीतिरिवाजअनुसार अन्तिम संस्कार गर्न बाध्य भयौँ ।’
शव नभेटिए पनि संस्कार गर्नुपर्ने बाध्यता
परिवारका अनुसार लामो समयसम्म खोजी गर्दा समेत नमोनारायणको कुनै सुराक नपाएपछि धार्मिक परम्पराअनुसार कुशको शव बनाएर दाहसंस्कार गरिएको हो । वास्तविक शव फेला नपरेको अवस्थामा अन्तिम संस्कार गर्नुपरेको पीडाले परिवारको दुःख झनै गहिरिएको छ । अन्तिम संस्कारमा स्थानीय राजनीतिकर्मी, सामाजिक अगुवा, आफन्त तथा ठूलो संख्यामा स्थानीयवासी सहभागी भएका थिए । दाहसंस्कारका क्रममा उपस्थित धेरैजसो स्थानीयवासी भावुक बनेका थिए ।
विपत्तिमा स्थानीय सरकारको साथ नपाएको परिवारको गुनासो
यसैबीच, पीडित परिवारले विपत्तिको कठिन घडीमा स्थानीय सरकारबाट अपेक्षित सहयोग प्राप्त हुन नसकेको गुनासो गरेको छ । आफूहरूले भोगिरहेको पीडा र समस्याप्रति स्थानीय सरकारले आवश्यक चासो देखाउँदै सहयोग गर्नुपर्ने परिवारको अपेक्षा छ । बाढीमा नमोनारायण बेपत्ता भएको २३ दिन बितिसक्दा पनि उनको वास्तविक अवस्थाबारे आधिकारिक जानकारी प्राप्त हुन सकेको छैन । शवसमेत फेला नपरी अन्तिम संस्कार गर्नुपरेको घटनाले परिवारलाई शोकसँगै अनिश्चितताको गहिरो पीडामा छोडेको छ ।
प्रतिक्रिया दिनुहोस् !