जीतपुरसिमरा (बारा), ३ असोज । बाराको जीतपुरसिमरा उपमहानगरपालिका–२, नेपाल केबुल अगाडि शनिबार साँझ खाजा पसलभित्र चक्कुले घाँटी रेटेर एक युवकको हत्या गरिएको छ । मृत्यु हुनेमा जीतपुरसिमरा–२ निवासी करिब ३५ वर्षीय शेरबहादुर खड्का रहेका छन् । सिमरास्थित सम्झना स्टाफ होटलमा खाजा खाँदै गरेका खड्कामाथि धारिलो हतियार प्रहार भएको थियो ।
गम्भीर घाइते भएका उनलाई तत्कालै उपचारका लागि जीतपुरसिमरा नगर अस्पताल लगिएको थियो । त्यहाँ उपचार सम्भव नभएपछि थप उपचारका लागि वीरगन्जस्थित बयोधा अस्पताल पुर्याइएको थियो । बयोधा अस्पतालमा चिकित्सकले ईसिजी गरेलगत्तै खड्कालाई मृत घोषणा गरेका हुन् । उनको शव हाल बयोधा अस्पतालमै राखिएको छ ।
प्रहरीले घटनाको मुचुल्का उठाउने तथा आवश्यक अनुसन्धान प्रक्रिया अघि बढाएको जनाएको छ । प्रारम्भिक विवरणअनुसार खड्का होटलमा बसिरहेका बेला चार जना युवाहरु मदिरा सेवन गरी त्यहाँ पुगेका थिए । उनीहरूमध्ये कसले चक्कु प्रहार गरेको हो भन्ने यकिन भइसकेको छैन । घटनामा संलग्न व्यक्ति स्थानीय नै रहेको प्रारम्भिक प्रहरी जानकारी छ ।
घटनापछि दुई जना युवक घटनास्थलबाट फरार भएका छन् भने अन्य दुई जना घाइते खड्कासँगै एम्बुलेन्समा अस्पताल पुगेका थिए । उनीहरूलाई अस्पतालबाटै प्रहरीले नियन्त्रणमा लिएको छ । फरार रहेका व्यक्तिहरूको खोजी भइरहेको प्रहरीले जनाएको छ । घटनाको जानकारी पाएलगत्तै इलाका प्रहरी कार्यालय सिमराका प्रहरी नायब उपरीक्षक दयाकृष्ण भट्टको नेतृत्वमा प्रहरी टोली घटनास्थल पुगेको थियो ।
प्रहरीले घटनास्थललाई नियन्त्रणमा लिएर सुरक्षित राख्नुका साथै प्रत्यक्षदर्शी तथा घटनासँग सम्बन्धित व्यक्तिहरूसँग सोधपुछ गरिरहेको छ । हत्या किन र कुन परिस्थितिमा भयो तथा घटनामा संलग्न व्यक्तिहरूको भूमिका के थियो भन्ने विषयमा प्रहरीले अनुसन्धान अघि बढाएको छ । घटनाले सिमरा क्षेत्रमा सुरक्षा व्यवस्थामाथि समेत प्रश्न उठाएको छ ।
प्रतिक्रिया दिनुहोस् !