वीरगंज (पर्सा), २८ भदौ । त्रिशूली नदीमा आएको बाढी र कृष्णभिरमा गएको पहिरोका कारण पृथ्वी राजमार्ग अवरुद्ध भएपछि काठमाडौं उपत्यकामा देखिएको एलपी ग्यासको अभाव कम गर्न तराईका ग्यास उद्योगहरूले उत्पादन र आपूर्ति बढाएका छन् । काठमाडौंसम्म ग्यास बोक्ने बुलेट पुग्न नसकेपछि तराईमै सिलिन्डरमा ग्यास भरेर साना–ठूला ट्रकमार्फत वैकल्पिक मार्ग हुँदै राजधानी पठाउन थालिएको हो ।
गत भदौ १४ गते त्रिशूली नदीमा आएको बाढीपछि पृथ्वी राजमार्गअन्तर्गत कृष्णभिरमा पहिरो गएर सडक अवरुद्ध बनेको थियो । भारतबाट ग्यास बोकेर आएका बुलेटसमेत काठमाडौंसम्म पुग्न नसकेपछि सरकारले वैकल्पिक सडक प्रयोग गरी सिलिन्डरमार्फत ग्यास ढुवानी गर्ने व्यवस्था मिलाएको हो । काठमाडौंमा बजारीकरण भइरहेका २६ वटा ग्यास उद्योगका सिलिन्डर अहिले तराईका विभिन्न उद्योगमा भरेर राजधानी पठाउने काम भइरहेको छ।
मकवानपुर, बारा, पर्सा, चितवन, महोत्तरी, धनुषा र नवलपरासीमा रहेका १४ वटा ग्यास उद्योगबाट काठमाडौंका लागि निरन्तर ग्यास रिफिलिङ भइरहेको जनाइएको छ । ग्यास अभाव कम गर्न केही उद्योगले नियमित समयभन्दा निकै बढी समयसम्म कारखाना सञ्चालन गरिरहेका छन् । विभिन्न उद्योगले दैनिक एक हजारदेखि ८ हजारसम्म सिलिन्डरमा ग्यास भरेर काठमाडौं पठाइरहेका छन् । नेपाल आयल निगमको समन्वयमा पृथ्वी राजमार्ग पूर्णरूपमा सञ्चालनमा नआएसम्म वैकल्पिक मार्गबाट यस्तो आपूर्ति जारी राख्ने तयारी गरिएको छ ।
सहाराले तीन सिफ्टमा भरिरहेको ८ हजारभन्दा बढी सिलिन्डर
हेटौँडास्थित सहारा ग्यास उद्योगले काठमाडौंमा बिक्री हुने एभरेस्ट र सुगम ब्रान्डका सिलिन्डरमा दैनिक ८ हजारसम्म ग्यास भरेर पठाइरहेको जनाएको छ । उद्योगले एभरेस्टका ४ हजार र सुगमका ४ हजार सिलिन्डरमा ग्यास भर्ने गरेको छ । उद्योग तीन सिफ्टमा सञ्चालन गरी चौबिसै घण्टा ग्यास रिफिलिङ भइरहेको सहारा ग्यास उद्योगका प्रबन्धक खड्ग थापाले बताए ।
उनका अनुसार उद्योगले दैनिक ८ देखि १२ हजार सिलिन्डरसम्म ग्यास भर्ने गरेको छ । त्यसमध्ये करिब २ हजार ५ सय सिलिन्डर सहारा ब्रान्डका लागि स्थानीय बजारमा पठाइन्छ भने ८ हजारभन्दा बढी सिलिन्डर काठमाडौंका लागि डिस्प्याच भइरहेको छ । काठमाडौं आपूर्तिका लागि पालुङको बाटो प्रयोग भइरहेको छ । साना ट्रक तथा काठमाडौंका पार्टी र डिलरका सवारीसाधनमार्फत दैनिक करिब ८ हजार ५ सय सिलिन्डर राजधानी पठाउने गरिएको थापाले बताए ।
उनका अनुसार ठूलो परिमाणमा ग्यास उत्पादन गर्दा उद्योगका कर्मचारीले १८ देखि २० घण्टासम्म काम गर्नुपरेको छ । राजमार्गका विभिन्न स्थानमा अवरुद्ध सडक खुल्नासाथ ग्यास लिन आउने सवारीसाधनको चापसमेत अत्यधिक बढ्ने गरेको उनले बताए ।
पर्साको मनोज ग्यासमा रातिसम्म रिफिलिङ
पर्साको परवानीपुरस्थित मनोज ग्यास उद्योग प्रालिले पनि काठमाडौंका लागि दैनिक १ हजार ६ सयदेखि १ हजार ८ सयसम्म सिलिन्डर भरेर पठाइरहेको छ । उद्योगले आफ्नै ब्रान्डसँगै काठमाडौंमा बिक्री हुने साल्ट ट्रेडिङ कर्पोरेसनको ‘एसटीसी’ र ‘लोकप्रिय’ ब्रान्डका सिलिन्डरमा समेत ग्यास भर्ने गरेको जनाएको छ ।
उद्योगमा कार्यरत सञ्जयकुमार मिश्रका अनुसार बिहान ९ बजेदेखि साँझ ५ बजेसम्म आफ्नै ब्रान्डको ग्यास भर्ने र त्यसपछि काठमाडौंका लागि आएका सिलिन्डरमा राति १२/१ बजेसम्म रिफिलिङ गर्ने गरिएको छ ।
लियो ग्यासले दैनिक ५ हजार सिलिन्डर पठाउँदै
बाराको लियो ग्यास उद्योग प्रालिले लोकप्रिय र श्रीमाया ब्रान्डका सिलिन्डरमा ग्यास भरेर बजारमा पठाइरहेको छ । उद्योग सञ्चालक तथा एलपी ग्यास उद्योग संघका कोषाध्यक्ष निर्मल खत्रीका अनुसार उद्योगले अहिले दैनिक करिब ५ हजार सिलिन्डर ग्यास बजारमा पठाइरहेको छ । त्यसमध्ये करिब २ हजारदेखि २ हजार ५ सय सिलिन्डर स्थानीय बजारका लागि छुट्याइन्छ भने बाँकी करिब ३ हजार सिलिन्डर काठमाडौं पठाउने गरिएको छ ।
विपद्को अवस्थामा उपभोक्तालाई ग्यास अभाव हुन नदिन उद्योगले आफ्नो क्षमता बढाएर काम गरिरहेको खत्रीले बताए । उनका अनुसार भारतबाट ग्यास आयात हुने क्रमसमेत रोकिएको छैन र उद्योगमा दैनिक करिब आधा दर्जन बुलेट ग्यास आउने गरेका छन् । लियो ग्यास उद्योगले बिहान ७ देखि दिउँसो ३ बजेसम्म र त्यसपछि दिउँसो ३ देखि राति ११ बजेसम्म दुई सिफ्टमा काम गरिरहेको छ ।
अम्बर र सुपर ग्यास पनि काठमाडौंको आपूर्तिमा
बाराको अम्बर ग्यास उद्योगले सिद्धार्थ र एसटीसी ब्रान्डका सिलिन्डरमा दैनिक करिब १ हजार २ सयसम्म ग्यास भरेर पठाइरहेको जनाएको छ । त्यस्तै, पर्सास्थित सुपर ग्यास उद्योगले काठमाडौंमा बिक्री हुने हिमाल ब्रान्डका सिलिन्डरमा ग्यास रिफिलिङ गरिरहेको छ ।
तराईका उद्योगहरूले आफ्नो नियमित उत्पादनसँगै काठमाडौंका विभिन्न ब्रान्डका सिलिन्डरमा ग्यास भरेर वैकल्पिक सडकमार्फत राजधानी पठाइरहेका छन् । राजमार्ग अवरुद्ध हुँदा बुलेटमार्फत ठूलो परिमाणमा ग्यास ढुवानी गर्न नसकिए पनि सिलिन्डरमार्फत आपूर्ति कायम राख्ने प्रयास भइरहेको छ ।
काठमाडौं उपत्यका लगायत केही क्षेत्रमा ग्यासको अभाव कायमै रहे पनि भारतबाट भने बजारको मागभन्दा बढी परिमाणमा ग्यास आपूर्ति भइरहेको तथ्यांक नेपाल आयल निगमले सार्वजनिक गर्दै आएको छ । पृथ्वी राजमार्ग पूर्ण रूपमा सञ्चालनमा नआएसम्म तराईका उद्योगबाट वैकल्पिक मार्ग हुँदै काठमाडौंमा ग्यास पठाउने व्यवस्था निरन्तर रहने बताइएको छ ।
प्रतिक्रिया दिनुहोस् !