वीरगंज (पर्सा), २८ भदौ । नेपाल–भारतबीचको सीमापार व्यापारलाई थप सहज, व्यवस्थित र प्रभावकारी बनाउने विषयलाई प्राथमिकतामा राख्दै नेपालका लागि भारतीय राजदूत नवीन श्रीवास्तवले भारतको रक्सौलस्थित एकीकृत जाँच चौकी (आईसीपी) को निरीक्षण गरेका छन् । निरीक्षणका क्रममा उनले सीमामा व्यापारिक गतिविधि सञ्चालन गर्ने विभिन्न निकायबीच प्रभावकारी समन्वय र प्रक्रियागत सुधारको आवश्यकता औँल्याएका छन् ।
आईसीपी निरीक्षणपछि सभागारमा सीमा व्यवस्थापन तथा व्यापारसँग प्रत्यक्ष जोडिएका भारतीय र नेपाली सरकारी निकायका अधिकारी तथा सरोकारवालाबीच उच्चस्तरीय समीक्षा बैठक आयोजना गरिएको थियो । बैठकमा सीमा शुल्कका सहायक आयुक्त प्रदीप कुमारसहित सीमा शुल्क विभागका अधिकारी, भारतीय भू–सीमा प्राधिकरण, सशस्त्र सीमा बल (एसएसबी), प्लान्ट क्वारेन्टाइन, भारतीय खाद्य सुरक्षा तथा मानक प्राधिकरणलगायतका प्रतिनिधि सहभागी थिए ।
नेपालतर्फको एकीकृत जाँच चौकीका वरिष्ठ अधिकारी तथा सम्बन्धित निकायका प्रतिनिधिको पनि बैठकमा सहभागिता रहेको थियो । बैठकमा सम्बोधन गर्दै राजदूत श्रीवास्तवले भारत र नेपालबीच लामो समयदेखि कायम रहेको ऐतिहासिक तथा मैत्रीपूर्ण सम्बन्धलाई व्यापारिक सहकार्यले थप बलियो बनाउँदै आएको उल्लेख गरे । उनले दुई देशबीचको व्यापारलाई अझ गतिशील बनाउन सीमामा देखिने प्रक्रियागत जटिलता र अवरोध हटाउन निरन्तर पहल आवश्यक रहेको बताए ।
सीमा क्षेत्रमा व्यापारिक प्रक्रिया सरल बनाउने, ढुवानी तथा लजिस्टिक्समा देखिने अवरोध न्यूनीकरण गर्ने र सम्बन्धित सरकारी निकायबीच समन्वयलाई प्रभावकारी बनाउने विषयमा उनले विशेष जोड दिए । सीमा शुल्क र लजिस्टिक्ससँग सम्बन्धित विभिन्न प्राविधिक तथा प्रशासनिक विषयमा समेत बैठकमा विस्तृत छलफल भएको थियो । राजदूत श्रीवास्तवले सीमामा खटिएका सुरक्षा तथा नियमनकारी निकायले आपसी समन्वयलाई अझ बलियो बनाउनुपर्ने बताए ।
उनले सबै निकायले छुट्टाछुट्टै रूपमा नभई एउटै टिमको भावनाका साथ काम गर्नुपर्नेमा जोड दिँदै व्यापारिक प्रयोजनका सवारीसाधन तथा सर्वसाधारणको आवागमनलाई सकेसम्म सहज र अवरोधरहित बनाउन अधिकारीहरूलाई आग्रह गरे । भारतको रक्सौल र नेपालको वीरगंज जोड्ने नाका दुई देशबीचको प्रमुख व्यापारिक मार्गका रूपमा रहेको छ । ठूलो परिमाणमा वस्तु आयात–निर्यात हुने यो नाकामा कार्यरत विभिन्न निकायबीचको समन्वय र प्रक्रियागत सुधारले सीमापार व्यापारको गति, लागत र समग्र दक्षतामा प्रत्यक्ष प्रभाव पार्ने देखिन्छ ।
यसै कारण राजदूत श्रीवास्तवको रक्सौल आईसीपी निरीक्षणलाई सीमापार व्यापार, लजिस्टिक्स र सीमा पूर्वाधारलाई थप प्रभावकारी बनाउने दिशामा महत्वपूर्ण पहलका रूपमा हेरिएको छ । निरीक्षण तथा समीक्षा बैठकमार्फत भारत र नेपालबीचको व्यापारिक आवागमनलाई थप छिटो, व्यवस्थित र सहज बनाउने तथा सीमा व्यवस्थापनमा संलग्न निकायबीच समन्वय सुदृढ गर्ने विषयलाई प्राथमिकता दिइएको संकेत गरेको छ ।
प्रतिक्रिया दिनुहोस् !