वीरगंज (पर्सा), २८ भदौ । सीमा क्षेत्रमा बढ्न सक्ने आपराधिक गतिविधि तथा अवैध कारोबार नियन्त्रण गर्न नेपाल र भारतका सुरक्षा निकायले संयुक्त निगरानीलाई तीव्रता दिएका छन् । सीमा क्षेत्रमा हुने तस्करी, लागुऔषध कारोबार, मानव बेचबिखन तथा ओसारपसार, जाली नोटको कारोबारदेखि चोरी–डकैतीसम्मका गतिविधि नियन्त्रण गर्ने उद्देश्यले नेपाल प्रहरी, सशस्त्र प्रहरी बल नेपाल र भारतीय सीमा सुरक्षा बल (एसएसबी) ले संयुक्त गस्ती गरेका छन् ।
आइतबार इलाका प्रहरी कार्यालयका प्रमुख प्रहरी निरीक्षक भानुभक्त अर्यालको नेतृत्वमा नेपाल प्रहरी र सशस्त्र प्रहरीका सुरक्षाकर्मी तथा भारतीय सीमा सुरक्षा बल (एसएसबी) का प्रहरी निरीक्षकसहितको संयुक्त टोलीले सीमा क्षेत्रमा ‘जोइन्ट पेट्रोल’ सञ्चालन गरेको हो । खुला सीमाको फाइदा उठाउँदै हुन सक्ने अवैध गतिविधि रोक्न दुवै देशका सुरक्षा निकायले सीमा क्षेत्रमा निगरानी र समन्वयलाई थप प्रभावकारी बनाउने विषयमा जोड दिएका छन् ।
संयुक्त गस्तीका क्रममा सीमावर्ती क्षेत्रमा देखिन सक्ने शंकास्पद गतिविधि, अस्वाभाविक आवतजावत तथा अवैध सामानको ओसारपसारमाथि विशेष निगरानी गर्ने विषयमा समेत छलफल भएको जनाइएको छ । सुरक्षा निकायका अनुसार सीमा क्षेत्रमा अवैध वस्तु तथा सामानको तस्करी, लागुऔषधको ओसारपसार, मानव बेचबिखन तथा ओसारपसार, जाली नोटको कारोबार, चोरी र डकैतीलगायतका गतिविधि नियन्त्रणका लागि नेपाल–भारत सुरक्षा संयन्त्रबीच नियमित सहकार्य अपरिहार्य छ । सोही आवश्यकतालाई ध्यानमा राख्दै संयुक्त गस्तीमार्फत सीमा सुरक्षाको अवस्थाबारे प्रत्यक्ष निगरानी र अन्तरक्रिया गरिएको हो ।
गस्ती तथा अन्तरक्रियाका क्रममा सीमाक्षेत्रमा देखिएका सुरक्षा चुनौती, आपराधिक गतिविधिको सम्भावित जोखिम र आगामी दिनमा अपनाउनुपर्ने सुरक्षा रणनीतिबारे दुवै देशका सुरक्षाकर्मीबीच छलफल भएको थियो । सीमा क्षेत्रमा हुने अपराध नियन्त्रणका लागि आवश्यक सूचना आदानप्रदानलाई प्रभावकारी बनाउने तथा आपसी समन्वयमा संयुक्त निगरानीलाई निरन्तरता दिने सहमति समेत भएको बताइएको छ । इलाका प्रहरी कार्यालयका प्रमुख प्रहरी निरीक्षक भानुभक्त अर्यालले सीमा क्षेत्रमा शान्ति सुरक्षा कायम गर्नुका साथै अपराध नियन्त्रण र नागरिकको सुरक्षालाई उच्च प्राथमिकतामा राखिएको बताएका छन् । सीमा क्षेत्रमा हुने शंकास्पद गतिविधिमाथि निगरानी बढाउँदै सुरक्षा व्यवस्थालाई थप चुस्त र प्रभावकारी बनाउने विषयमा उनले जोड दिएका थिए ।
नेपाल–भारत सीमामा हुने अवैध गतिविधि नियन्त्रणका लागि दुवै देशका सुरक्षा निकायबीच हुने यस्ता संयुक्त गस्तीले अपराधी तथा तस्करीमा संलग्न समूहलाई निरुत्साहित गर्ने अपेक्षा गरिएको छ । साथै, सीमा क्षेत्रमा सुरक्षा उपस्थिति बलियो बनाउँदै सर्वसाधारणमा सुरक्षित वातावरणको अनुभूति दिलाउनसमेत संयुक्त गस्ती प्रभावकारी हुने सुरक्षा निकायको विश्वास छ ।
प्रतिक्रिया दिनुहोस् !