वीरगंज (पर्सा), २७ भदौ । नेपाली कम्युनिष्ट पार्टी (नेकपा) का सह–संयोजक तथा पूर्वप्रधानमन्त्री माधवकुमार नेपालले संविधानको रक्षा, संघीयता र समावेशितालाई संस्थागत गर्न परिवर्तनकारी शक्तिहरूबीच कार्यगत एकता अपरिहार्य रहेको बताएका छन् । वीरगंजमा शनिबार आयोजित पत्रकार भेटघाटमा नेपालले लामो संघर्ष र बलिदानबाट प्राप्त मौलिक हक, लोकतन्त्र, संघीयता तथा समावेशितालगायत संवैधानिक उपलब्धि नै जोखिममा पर्न थालेको दाबी गर्दै त्यसको संरक्षणका लागि परिवर्तनकारी शक्तिहरू एक ठाउँमा उभिनुपर्ने बताए ।
उनले संविधान सामान्य राजनीतिक परिवर्तनको परिणाम नभएको उल्लेख गर्दै अहिलेको प्रमुख चुनौती नै यसको रक्षा गर्नु रहेको बताए । ‘मुख्य कुरा संघीयता र समावेशिता जोगाउने चिन्ता हो,’ नेपालले भने, ‘जनताले सुशासनको महसुस गर्न पाइरहेका छैनन् । त्यसैले परिवर्तनकारी शक्ति एकजुट भएर अगाडि बढ्नुको विकल्प छैन ।’ नेपालले आदिवासी, महिला, जनजाति, मधेशी, दलित, मुस्लिम, अपाङ्गता भएका व्यक्ति तथा पिछडिएको क्षेत्रलगायत सीमान्तकृत समुदायले संविधानबाट प्राप्त गरेका अधिकारको व्यवहारिक कार्यान्वयन हुनुपर्नेमा जोड दिए । थप अधिकार प्राप्तिका लागि पनि सम्बन्धित शक्तिहरूले एकीकृत रूपमा संघर्ष अघि बढाउनुपर्ने उनको भनाइ थियो ।
एमालेसँग तत्काल एकता सम्भव छैन
पूर्वप्रधानमन्त्री नेपालले नेकपा (एमाले)सँग तत्काल पार्टी एकता हुने सम्भावना नरहेको स्पष्ट पारेका छन् । यद्यपि मुलुकको विकास, समृद्धि र राष्ट्रिय हितका विषयमा सबै कम्युनिष्ट पार्टीबीच कार्यगत सहकार्य र एकता आवश्यक रहेको उनले बताए ।
वर्तमान सरकारप्रति जनताको ठूलो अपेक्षा रहे पनि उनीहरूको चाहनाअनुसार काम हुन नसकेको नेपालले टिप्पणी गरे । यही भदौ १० गते भोटेकोशी नदीमा आएको बाढीका क्रममा सरकारले बेपत्ता व्यक्तिको खोजी तथा उद्धारमा ढिलाइ गरेको र त्यसले थप जनधनको क्षति भएको उनले आरोप लगाए । ‘देश अहिले विपत्तिमा छ । हिमाली सुनामीका कारण ठूलो जनधनको क्षति भएको छ,’ उनले भने, ‘खोजी कार्यमा सरकारले पर्याप्त ध्यान दिन सकेको छैन । समयमै भारत र चीन सरकारको सहयोग लिन सक्नुपर्थ्यो । भोटेकोशी बाढीका क्रममा सरकार धेरै ठाउँमा चुकेको छ ।’ नेपालले गत भदौ २३ र २४ गते भएको जेनजी आन्दोलनका क्रममा भएका घटनाको समेत निष्पक्ष छानबिन हुनुपर्ने माग गरे ।
समाजवादी प्रेस संगठन नेपाल पर्साका अध्यक्ष शम्भुकुमार सुमनको अध्यक्षतामा सम्पन्न पत्रकार भेटघाटमा मधेश प्रदेशका उद्योग, वाणिज्य तथा पर्यटनमन्त्री कनिश पटेल, नेकपा पर्साका सह–इन्चार्ज मनोज चौधरी, जिल्ला संयोजक जयप्रकाश थारु, गंगा खड्का, बाबुराम कौशिक र केन्द्रीय सदस्य किशोरी कुशवाहालगायतको उपस्थिति थियो ।
प्रतिक्रिया दिनुहोस् !