वीरगंज (पर्सा), १० भदौ । वीरगंज महानगरपालिका–छपकैयामा बुधबार दुई समुदायबीच भएको झडपको घटनालाई लिएर नेपाली कांग्रेस पर्सा क्षेत्र नम्बर २ का सभापति मोहम्मद शाहबुद्दीनलाई प्रहरीले नियन्त्रणमा लिएको छ । घटनामा उनको संलग्नता देखिएको भन्दै प्रहरीले अनुसन्धानका लागि नियन्त्रणमा लिएको जनाएको छ । जिल्ला प्रहरी कार्यालय पर्साका प्रमुख प्रहरी उपरीक्षक पवनकुमार भट्टराईले शाहबुद्दीन प्रहरी नियन्त्रणमा रहेको पुष्टि गरेका छन् ।
यद्यपि, उनलाई कुन कानुनी प्रावधानअन्तर्गत र कुन मुद्दामा नियन्त्रणमा लिइएको हो भन्नेबारे प्रहरीले औपचारिक रूपमा खुलाएको छैन । प्रहरी स्रोतका अनुसार छपकैयामा झण्डा राख्ने विषयबाट सुरु भएको विवादले उग्र रूप लिएपछि भएको झडपमा शाहबुद्दीनको संलग्नता देखिएपछि अनुसन्धानका लागि उनलाई नियन्त्रणमा लिइएको हो ।
बुधबार दिउँसो टावर लाइटको पोलमा राखिएको हनुमान जयन्तीको झण्डाको छेउमा अर्को झण्डा राख्ने विषयलाई लिएर विवाद सुरु भएको थियो । विवाद बढेपछि अवस्था नियन्त्रणमा लिन वीरगंज महानगरपालिकाको टोली घटनास्थल पुगेको थियो । दुवै पक्षबीच सहमति जुटाएर महानगरपालिकाको टोलीले उक्त पोलमा नेपालको राष्ट्रिय झण्डा राखेको थियो । तर महानगरपालिकाको टोली घटनास्थलबाट फर्किएपछि राष्ट्रिय झण्डा हटाउने विषयलाई लिएर पुनः विवाद चर्किएको र त्यसपछि दुई पक्षबीच झडप भएको प्रहरीको भनाइ छ ।
झडपका क्रममा ६ जना सर्वसाधारण र एक जना प्रहरी जवान गरी सात जना घाइते भएका छन् । घाइतेहरूको अवस्थाबारे विस्तृत विवरण भने प्रहरीले सार्वजनिक गरेको छैन । घटनापछि सम्भावित तनाव र थप झडप रोक्न छपकैयाका वडा नम्बर १, २ र ३ मा नेपाल प्रहरी तथा सशस्त्र प्रहरीको सुरक्षा उपस्थिति बढाइएको छ । सुरक्षा निकायको परिचालनपछि वीरगंजको अवस्था अहिले सामान्य रहेको प्रहरीले जनाएको छ । संवेदनशील क्षेत्रमा सुरक्षा निगरानी बढाइएको छ भने घटनासँग सम्बन्धित पक्ष तथा व्यक्तिहरूमाथि अनुसन्धान अघि बढाइएको छ ।
शाहबुद्दीनमाथि अनुसन्धान अघि बढ्यो
प्रहरीले कांग्रेस नेता शाहबुद्दीनलाई नियन्त्रणमा लिएर घटनामा उनको भूमिकाबारे अनुसन्धान गरिरहेको छ । तर, नियन्त्रणमा लिनुपर्ने कानुनी आधार र उनीविरुद्ध लगाइएको आरोपबारे प्रहरीले औपचारिक जानकारी सार्वजनिक गरेको छैन । झण्डा राख्ने विषयबाट सुरु भएको विवाद केही समयमै सामुदायिक तनावमा परिणत भई झडपसम्म पुगेपछि प्रहरीले घटनालाई संवेदनशील रूपमा लिएको छ । प्रहरीले घटनाको कारण, झडपमा संलग्न व्यक्तिहरू तथा घटनाक्रमबारे थप अनुसन्धान भइरहेको जनाएको छ ।
प्रतिक्रिया दिनुहोस् !