वीरगंज (पर्सा), २ भदौ । राष्ट्रिय स्वतन्त्र पार्टीका सांसद हरि (बुद्धिप्रसाद) पन्तले सांसदसँग स्रोत र कोषको व्यवस्था नहुँदा निर्वाचन क्षेत्रमा देखिएका सामान्य समस्यासमेत समाधान गर्न नसकेर निरीह बन्नुपरेको बताएका छन् । मंगलबार बसेको प्रतिनिधिसभाको बैठकमा बोल्दै सांसद पन्तले निर्वाचन क्षेत्रका जनताले आफ्ना समस्या समाधानका लागि सांसदसँग अपेक्षा राख्नु स्वाभाविक भए पनि सांसदसँग त्यसका लागि आवश्यक स्रोत र कोष नहुँदा समस्या समाधान गर्न नसकिएको बताए ।
उनका अनुसार निर्वाचन क्षेत्रमा देखिने कतिपय समस्या स्थानीय सरकारले न्यून बजेट र सीमित जनशक्ति परिचालन गरेर तत्काल समाधान गर्न सक्ने खालका छन् । तर सामान्य समस्यासमेत समयमा समाधान नहुँदा त्यसको प्रत्यक्ष असर सर्वसाधारण र विद्यार्थीमा परेको उनले बताए । त्यस्तै कतिपय विद्यालयमा पर्याप्त डेस्क–बेन्च नहुँदा विद्यार्थी भुइँमा बसेर पढ्नुपर्ने तथा कक्षाकोठामा पंखाको व्यवस्था नहुँदा गर्मीका कारण विद्यार्थी बेहोस हुने अवस्थासमेत रहेको उनले सदनलाई जानकारी गराएका थिए ।
सांसद पन्तले सांसदसँग आफ्ना निर्वाचन क्षेत्रका यस्ता समस्या समाधान गर्ने स्रोत नहुँदा जनताका समस्या हेरेर फर्किनुबाहेक विकल्प नरहेको बताए । उनले विगतमा रहेको संसदीय कोषको दुरुपयोग नभएको भए अहिले त्यसलाई सही ढङ्गले सदुपयोग गर्न सकिने अवस्था रहने धारणा पनि राखे । उनले उद्देश्य सही भएपनि पात्र र प्रवृत्ति गलत हुँदा कतिपय विषय नै विकृत बन्न पुगेका उदाहरणका रूपमा संसदीय कोषको विषयलाई लिन सकिने बताए ।
प्रतिक्रिया दिनुहोस् !