वीरगंज (पर्सा), २४ साउन । पर्साको विन्दवासिनी गाउँपालिकाबाट गाँजासहित एक जनालाई प्रहरीले पक्राउ गरेको छ । विन्दवासिनी गाउँपालिका–४ मधवलस्थित इटियाही–मधवल सडकखण्डबाट ३९ किलो २ सय ५० ग्राम गाँजा जस्तो देखिने पदार्थसहित एक जनालाई पक्राउ गरिएको सशस्त्र प्रहरीले जनाएको छ ।
शनिबार राति करिब पौने १२ बजे वि.ओ.पी. अमरपट्टी, वि.ओ.पी. प्रसौनीभाठा र प्रहरी चौकी अमरपट्टीको संयुक्त टोलीले विशेष सूचनाका आधारमा चेकजाँच तथा निगरानी गरिरहेको थियो । सो क्रममा इटियाहीबाट मधवलतर्फ आउँदै गरेका व्यक्तिहरूले प्रहरी टोलीलाई देखेपछि तीन वटा मोटरसाइकल र तीन वटा झोला झाडीमा फालेर भागेका थिए ।
प्रहरीले तीमध्ये एक जनालाई नियन्त्रणमा लिएर झोला जाँच गर्दा गाँजा जस्तो देखिने पदार्थ फेला पारेको हो । पक्राउ परेका व्यक्ति, बरामद पदार्थ र मोटरसाइकललाई आवश्यक अनुसन्धान तथा कारबाहीका लागि प्रहरी चौकी अमरपट्टीमा बुझाइएको सशस्त्र प्रहरी बल नेपाल १३ न. गण पर्साका प्रवक्ता सशस्त्र प्रहरी नायब उपरीक्षक मोहनराज निरौलाले जानकारी दिए ।
प्रतिक्रिया दिनुहोस् !