वीरगंज (पर्सा), १३ साउन । सगरमाथा एकेडेमी, वीरगंजले गुरु–शिष्य परम्पराको सम्मान गर्दै गुरुपूर्णिमा विशेष कार्यक्रम भव्य रूपमा सम्पन्न गरेको छ । विद्यार्थीहरूले आफ्ना आदरणीय गुरु–गुरुआमाप्रति श्रद्धा, सम्मान र कृतज्ञता व्यक्त गर्दै टीका, खादा, माला तथा मायाको चिनो अर्पण गरेका थिए । कार्यक्रममा विद्यालयका संस्थापक जियालाल गुप्ता, शिक्षक–शिक्षिका, अभिभावक तथा विद्यार्थीहरूको उल्लेखनीय उपस्थिति रहेको थियो । कार्यक्रममा विद्यार्थीहरूले विद्यालयका सम्पूर्ण शिक्षक–शिक्षिकाहरूलाई खादा ओढाएर सम्मान गरेका थिए ।
गुरुको महत्त्व झल्काउने प्रेरणादायी भाषण, भक्तिपूर्ण कविता, सांस्कृतिक नृत्य तथा विभिन्न सिर्जनात्मक प्रस्तुतिले कार्यक्रमलाई आकर्षक बनाएको थियो । कार्यक्रमको सञ्चालन कक्षा १० का विद्यार्थी आयुष गुप्ताले गरेका थिए । विद्यालयका संस्थापक जियालाल गुप्ताले गुरुपूर्णिमाले गुरु–शिष्य सम्बन्धको महत्वलाई स्मरण गराउने मात्र नभई समाजमा सम्मान, अनुशासन र संस्कारको सन्देश फैलाउने अवसर प्रदान गर्ने बताए । उनले भने, ‘विद्यालयको उद्देश्य विद्यार्थीलाई केवल शैक्षिक रूपमा अब्बल बनाउनु मात्र होइन, संस्कारवान, जिम्मेवार र असल नागरिकका रूपमा विकास गर्नु पनि हो ।
गुरुको सम्मान गर्न सिक्ने विद्यार्थीले जीवनका हरेक क्षेत्रमा सफलता हासिल गर्न सक्छन् ।’ उनले विद्यालयले गुणस्तरीय शिक्षासँगै नैतिक शिक्षा, नेतृत्व विकास, अनुशासन तथा व्यक्तित्व विकासलाई प्राथमिकतामा राख्दै यस्ता रचनात्मक कार्यक्रमलाई निरन्तरता दिँदै आएको जानकारी दिए । यस्ता गतिविधिले विद्यार्थीमा आत्मविश्वास, सामाजिक उत्तरदायित्व र सकारात्मक सोचको विकास हुने विश्वाससमेत उनले व्यक्त गरे ।
कार्यक्रमको अन्त्यमा विद्यालय परिवारले सम्पूर्ण शिक्षक–शिक्षिकाहरूको निस्वार्थ समर्पण, त्याग र योगदानप्रति हार्दिक आभार व्यक्त गर्दै उनीहरूको मार्गदर्शनले नै विद्यार्थीहरूको उज्ज्वल भविष्य निर्माण भइरहेको उल्लेख गरेको थियो । साथै, यस्ता कार्यक्रमले गुरु–शिष्यबीचको सम्बन्धलाई अझ सुदृढ बनाउँदै विद्यालयमा सम्मान, संस्कार र शैक्षिक उत्कृष्टताको वातावरण कायम राख्न महत्वपूर्ण भूमिका खेल्ने विश्वास व्यक्त गरिएको थियो ।
प्रतिक्रिया दिनुहोस् !