गोलबजार (सिरहा), २८ असार । भारतीय सुटर प्रयोग गरी हत्या तथा गोली प्रहार गराएको आरोप लागेका दुई अभियुक्तलाई सिरहा जिल्ला अदालतले पुर्पक्षका लागि कारागार चलान गर्ने आदेश दिएको छ । जिल्ला प्रहरी कार्यालय सिरहाका अनुसार कर्तव्य ज्यान, ज्यान मार्ने उद्योग तथा संगठित अपराधसम्बन्धी छुट्टाछुट्टै मुद्दामा पक्राउ परेका उपेन्द्र यादव र हरी ठाकुर बरहीलाई अदालतले थुनामा राखेर मुद्दाको पुर्पक्ष अघि बढाउन आदेश दिएको हो ।
प्रहरीका सूचना अधिकारी तथा प्रहरी नायब उपरीक्षक रमेशबहादुर पालका अनुसार प्रेमनाथ यादव हत्या प्रकरणका मुख्य अभियुक्त उपेन्द्र यादवविरुद्ध कर्तव्य ज्यान र संगठित अपराध तथा श्यामसुन्दर ठाकुरमाथि भएको गोली प्रहार घटनाका अभियुक्त हरी ठाकुर बरहीविरुद्ध ज्यान मार्ने उद्योग र संगठित अपराधको मुद्दा दर्ता गरिएको छ ।
प्रहरीका अनुसार गत पुस १६ गते सिरहा नगरपालिका–७ स्थित मैनावती नदी किनारको बाँसघारीमा ४२ वर्षीय प्रेमनाथ यादवको गोली हानी हत्या गरिएको थियो । अनुसन्धानका क्रममा उपेन्द्र यादवले योजनाबद्ध रूपमा भारतबाट सुटर बोलाएर हत्या गराएको खुलेपछि उनलाई गत वैशाख २७ गते पक्राउ गरी जिल्ला सरकारी वकिल कार्यालयमार्फत अदालतमा पेश गरिएको थियो ।
यस्तै, गत माघ ४ गते औरही गाउँपालिका–५ स्थित जितिया मन्दिर परिसरमा श्यामसुन्दर ठाकुरमाथि भएको गोली प्रहार घटनामा पनि भारतीय सुटर प्रयोग गरिएको प्रहरीको दाबी छ । घटनामा संलग्न रहेको आरोपमा पक्राउ परेका हरी ठाकुर बरहीले भारतबाट सुटर मगाएर गोली प्रहार गराएको अनुसन्धानबाट खुलेको प्रहरीले जनाएको छ ।
बरहीलाई पनि गत वैशाख २७ गते सिरहा नगरपालिका–१ स्थित हनुमानचोकबाट पक्राउ गरिएको थियो ।
प्रारम्भिक प्रमाण र अनुसन्धानका आधारमा सिरहा जिल्ला अदालतले दुवै अभियुक्तलाई पुर्पक्षका लागि कारागार चलान गर्ने आदेश दिएको जिल्ला प्रहरी कार्यालय सिरहाले जनाएको छ ।
प्रतिक्रिया दिनुहोस् !