जनकपुरधाम (धनुषा), १७ असार । सम्पन्न तथा अन्तिम चरणमा पुगेका विकास आयोजनाको भुक्तानी रोकिएको विरोधमा धनुषाका निर्माण व्यवसायीहरूले भौतिक पूर्वाधार विकास कार्यालय धनुषा र कोष तथा लेखा नियन्त्रकको कार्यालयमा तालाबन्दी गरेका छन् । निर्माण व्यवसायी संघ धनुषाको नेतृत्वमा भएको आन्दोलनमा सहभागी व्यवसायीहरूले आर्थिक वर्षको अन्तिम दिनसम्म पनि सम्पन्न योजनाको भुक्तानी हुन नसक्दा आफूहरू गम्भीर आर्थिक संकटमा परेको बताएका छन् । उनीहरूका अनुसार मधेश प्रदेश सरकारको अर्थ मन्त्रालयबाट आवश्यक स्वीकृति नआएको भन्दै भुक्तानी प्रक्रिया रोकिएको हो ।
निर्माण व्यवसायी संघ धनुषाका पूर्व महासचिव विनोद कर्णले ३१११२ शीर्षक अन्तर्गत विभिन्न जातीय मठमन्दिर तथा आवासीय निर्माणसम्बन्धी योजनाको भुक्तानी रोकिएको जानकारी दिए । उनका अनुसार सुरुमा सोही शीर्षकका केही योजनाको भुक्तानी गरिएको भए पनि असार मसान्त आउन करिब दुई साताअघि स्वीकृति नलिएको भन्दै बाँकी फाइलको भुक्तानी रोकिएको हो ।
कर्णका अनुसार धनुषामा मात्रै यस्ता ४८ वटा योजनाको करिब १४ करोड रुपैयाँ भुक्तानी रोकिएको छ । प्रदेशभरि भने एक सयभन्दा बढी योजनाको भुक्तानी प्रभावित भएको हुन सक्ने उनको अनुमान छ । सरकारबाट समयमै भुक्तानी नहुँदा बैंक ग्यारेन्टी नवीकरण, मजदुरको पारिश्रमिक, निर्माण सामग्री आपूर्तिकर्ताको भुक्तानी तथा बैंक ऋण तिर्न कठिन भएको भन्दै व्यवसायीहरूले तत्काल भुक्तानी निकासा गर्न माग गरेका छन् ।
यता, भौतिक पूर्वाधार विकास कार्यालय, जनकपुरधामका प्रमुख सञ्जीवकुमार साहले निर्माण व्यवसायी तथा उपभोक्ता समितिले तालाबन्दी गरेपछि कार्यालयको नियमित काम प्रभावित भएको बताए । उनका अनुसार गैरआवासीय भवन निर्माण शीर्षकअन्तर्गत पूर्वस्वीकृति नलिइएको भन्दै कोष तथा लेखा नियन्त्रकको कार्यालयले भुक्तानी रोक्न पत्राचार गरेको हो । त्यसपछि अर्थ मन्त्रालयबाट ’बाधा अड्काउ फुकाउ’ सम्बन्धी आदेश प्राप्त भएपछि मात्रै भुक्तानी गर्न निर्देशन आएकाले हाल भुक्तानी प्रक्रिया रोकिएको उनले स्पष्ट पारे । निर्माण व्यवसायीहरूले तत्काल भुक्तानी प्रक्रिया अघि नबढाइए आन्दोलन थप सशक्त बनाउने चेतावनी दिएका छन् ।
प्रतिक्रिया दिनुहोस् !