वीरगंज (पर्सा), १२ असार । वीरगंजस्थित नेशनल मेडिकल कलेजले चिकित्सा शिक्षाको गुणस्तर अभिवृद्धि तथा शिक्षकहरूको पेशागत दक्षता विकास गर्ने उद्देश्यले सञ्चालन गरेको ६ दिने ‘फ्याकल्टी डेभलपमेन्ट ट्रेनिङ’ शुक्रबार सम्पन्न भएको छ । चिकित्सा शिक्षा विभाग, इन्स्टिच्युट अफ मेडिसिन (आई.ओ.एम.), काठमाडौंको सहकार्यमा असार ७ देखि १२ गतेसम्म सञ्चालन भएको तालिमको समापन समारोह कलेजको आई.बि.एम.एस. ब्लकस्थित कन्फरेन्स हलमा आयोजित गरिएको थियो ।
समारोहको अध्यक्षता कलेजका प्रिन्सिपल प्रा. डा. के.एन. सिंहले गर्नुभएको थियो भने अध्यक्ष प्रा. डा. जैनुद्दीन अन्सारी प्रमुख अतिथिका रूपमा उपस्थित थिए । समारोहमा इन्स्टिच्युट अफ मेडिसिनका प्रा. डा. निर्जु रञ्जित, प्रा. डा. संघरत्न बज्राचार्य तथा प्रा. डा. रमेश आचार्य विशिष्ट अतिथिका रूपमा सहभागी भएका थिए । त्यस्तै, अस्पताल निर्देशक डा. इशरत जहान, एडमिसन तथा मार्केटिङ निर्देशक अबिद हुसेन अन्सारी, उप–प्राचार्य डा. रविशंकर गुप्ता तथा नर्सिङ क्याम्पसकी उप–प्राचार्य प्रा. डा. बबिता सिंहलगायतको उल्लेखनीय उपस्थिति रहेको थियो ।
समापन कार्यक्रममा प्रशिक्षार्थीहरूले तालिमबाट हासिल गरेका अनुभव र सिकाइ साझा गरेका थिए । वक्ताहरूले यस्ता क्षमता अभिवृद्धि कार्यक्रमले आधुनिक शिक्षण विधि, प्रभावकारी विद्यार्थी मूल्याङ्कन, अनुसन्धान संस्कृतिको विकास तथा शिक्षकहरूको व्यावसायिक दक्षता अभिवृद्धिमा महत्वपूर्ण भूमिका खेल्ने धारणा व्यक्त गरे । प्रमुख अतिथि प्रा. डा. जैनुद्दीन अन्सारीले संस्थाले शैक्षिक उत्कृष्टतालाई थप सुदृढ बनाउन यस्ता तालिमलाई आगामी दिनमा पनि निरन्तर सञ्चालन गर्ने प्रतिबद्धता व्यक्त गरे । उनले तालिमलाई सफल बनाउन योगदान पुर्याउने प्रशिक्षक तथा सहभागी सबैप्रति आभारसमेत व्यक्त गरे ।
कार्यक्रमका अवसरमा तालिम सफलतापूर्वक पूरा गरेका सहभागीहरूलाई प्रमाणपत्र वितरण गरिएको थियो । अन्त्यमा उप–प्राचार्य डा. रविशंकर गुप्ताले धन्यवाद ज्ञापन गर्दै औपचारिक रूपमा कार्यक्रम समापन भएको घोषणा गरेका थिए । छ दिनसम्म सञ्चालन भएको तालिममा चिकित्सा शिक्षासँग सम्बन्धित विविध विषयमा विशेषज्ञ प्रशिक्षकहरूले सहजीकरण गरेका थिए । तालिमले सहभागी शिक्षकहरूको ज्ञान, सीप र शिक्षण क्षमतामा उल्लेखनीय वृद्धि भएको विश्वास आयोजकले व्यक्त गरेको छ । 
प्रतिक्रिया दिनुहोस् !