वीरगंज (पर्सा), ९ असार । पर्साको जगरनाथपुर गाउँपालिकाले वन संरक्षण, वातावरणीय व्यवस्थापन तथा स्थानीय तहस्तरमा प्रभावकारी कार्यक्रम सञ्चालन गरेको भन्दै राष्ट्रिय स्तरको सम्मान प्राप्त गरेको छ । नेपाल सरकार, कृषि, वन तथा वातावरण मन्त्रालय अन्तर्गतको रेड कार्यान्वयन केन्द्र, बबरमहल काठमाडौंले गाउँपालिकालाई ‘प्रशंसा तथा प्रमाण–पत्र’ सहित नगद १ लाख २५ हजार रुपैयाँ प्रदान गर्दै सम्मानित गरेको हो ।
‘समृद्धिका लागि वन’ परियोजनाअन्तर्गत सञ्चालन भएका कार्यक्रमहरूको प्रभावकारी कार्यान्वयन, स्थानीय स्तरमा वन विकास, वातावरण संरक्षण तथा प्राकृतिक स्रोतहरूको दिगो व्यवस्थापनमा पुर्याएको उल्लेखनीय योगदानको कदर गर्दै गाउँपालिकालाई सम्मान गरिएको हो । रेड कार्यान्वयन केन्द्रका अनुसार आर्थिक वर्ष २०८१/०८२ मा परियोजनाअन्तर्गत सञ्चालन भएका गतिविधिहरूको मूल्यांकनका आधारमा मधेश प्रदेशभरका स्थानीय तहमध्ये जगरनाथपुर गाउँपालिका उत्कृष्ट ठहरिएको हो । सो उपलब्धिका आधारमा गाउँपालिकालाई प्रशंसा–पत्रसहित नगद पुरस्कार प्रदान गरिएको केन्द्रले जनाएको छ ।
सम्मानपत्रमा गाउँपालिकाले वन संरक्षण, हरियाली प्रवद्र्धन, वातावरणीय सन्तुलन कायम राख्न तथा प्राकृतिक स्रोतको संरक्षणमा प्रभावकारी भूमिका निर्वाह गरेको उल्लेख गरिएको छ । साथै आगामी दिनमा पनि यस्ता कार्यलाई निरन्तरता दिँदै वातावरण संरक्षणका क्षेत्रमा नमूना कार्य गर्न शुभकामना व्यक्त गरिएको छ । वन तथा वातावरण संरक्षणका क्षेत्रमा प्राप्त यो सम्मानले जगरनाथपुर गाउँपालिकाको छवि थप उचो बनाएको स्थानीयवासीको भनाइ छ । गाउँपालिकाले पछिल्ला वर्षहरूमा वृक्षारोपण, सामुदायिक वन संरक्षण, वातावरणमैत्री विकास कार्यक्रम तथा जनचेतनामूलक अभियान सञ्चालन गर्दै आएको छ ।
गाउँपालिकाका जनप्रतिनिधि तथा कर्मचारीहरूले यो सम्मान सम्पूर्ण गाउँवासीको साझा उपलब्धि भएको बताएका छन् । उनीहरूले वन तथा वातावरण संरक्षणलाई विकासको आधार मानी आगामी दिनमा पनि संरक्षणमुखी कार्यक्रमलाई निरन्तरता दिने प्रतिबद्धता व्यक्त गरेका छन् । मधेश प्रदेशमै उत्कृष्ट स्थानीय तहको रूपमा प्राप्त यो सम्मानले जगरनाथपुर गाउँपालिकालाई वातावरण संरक्षण र दिगो विकासका क्षेत्रमा थप जिम्मेवार र सक्रिय बन्न प्रेरणा मिल्ने अपेक्षा गरिएको छ । 
प्रतिक्रिया दिनुहोस् !