प्रमुख प्रशासकीय अधिकृत खतिवडा अनुपस्थित हुँदा धोबिनी गापाको नीति तथा कार्यक्रम बैठक स्थगित

वीरगंज (पर्सा), १ असार । धोबिनी गाउँपालिकाको आगामी आर्थिक वर्ष २०८३-८४ को नीति तथा कार्यक्रम तय गर्ने उद्देश्यले सोमबार बोलाइएको महत्वपूर्ण बैठक प्रमुख प्रशासकीय अधिकृत कृष्णा प्रसाद खतिवडाको अनुपस्थितिका कारण अन्तिम समयमा स्थगित भएको छ । बिहान ११ बजेदेखि सञ्चालन हुने तय भएको बैठकमा गाउँपालिका अध्यक्ष, उपाध्यक्ष, वडाध्यक्ष, कर्मचारी, स्थानीयवासी तथा सञ्चारकर्मी समयमै उपस्थित भएपनि प्रमुख प्रशासकीय अधिकृत नआएपछि कार्यक्रम अगाडि बढ्न नसकेको हो ।

गाउँपालिका अध्यक्ष मदन प्रसाद चौहानका अनुसार प्रमुख प्रशासकीय अधिकृत खतिवडाकी आमाको स्वास्थ्य अवस्था अचानक बिग्रिएपछि उनी अस्पताल जान बाध्य भएको जानकारी प्राप्त भएको थियो । अध्यक्ष चौहानले दिनभर बैठक सञ्चालनको प्रयास गरिए पनि प्रमुख प्रशासकीय अधिकृतसँग सम्पर्क स्थापित हुन नसकेकाले बैठक स्थगित गर्नुपरेको बताए । ‘हामी सबै आवश्यक तयारीका साथ उपस्थित थियौं । पारिवारिक समस्याका कारण उहाँ उपस्थित हुन सक्नुभएन । सम्पर्कसमेत हुन नसकेपछि बैठक सञ्चालन गर्ने अवस्था रहेन,’ अध्यक्ष चौहानले भने ।

बैठक स्थगित भएपछि जनप्रतिनिधिहरूले भने असन्तुष्टि व्यक्त गरेका छन् । वडा नम्बर ३ का वडा अध्यक्ष राजकिशोर प्रसाद कुर्मीले बिहानदेखि साँझसम्म प्रतीक्षामा बस्नुपर्दा आफूहरू निराश भएको बताए । नौ वर्षको जनप्रतिनिधि अनुभवमा यस्तो अवस्था पहिलो पटक देख्नुपरेको उल्लेख गर्दै उनले गाउँपालिकाको प्रशासनिक व्यवस्थापनमाथि प्रश्न उठाए । ‘नीति तथा कार्यक्रमजस्तो महत्वपूर्ण विषयमा छलफल गर्न सबैलाई बोलाएर दिनभर प्रतीक्षा गराइयो, तर कुनै निष्कर्ष निस्किएन । यसले जनप्रतिनिधिको भूमिकाप्रति समेत सम्मानजनक व्यवहार नभएको अनुभूति गराएको छ,’ उनले भने ।

स्थानीयवासीहरूले पनि गाउँपालिकाभित्र जनप्रतिनिधि र प्रमुख प्रशासकीय अधिकृतबीच लामो समयदेखि समन्वयको अभाव रहेको गुनासो गर्दै आएका छन् । उनीहरूका अनुसार यही कारण विकास निर्माणका काम, प्रशासनिक सेवा प्रवाह तथा अन्य गतिविधिहरू प्रभावित हुने गरेका छन् । महत्वपूर्ण नीति तथा कार्यक्रम प्रस्तुत गर्ने दिनमै बैठक स्थगित भएपछि गाउँपालिकाको प्रशासनिक कार्यसम्पादन र व्यवस्थापन क्षमतामाथि प्रश्न उठ्न थालेको छ । स्थानीयवासी तथा जनप्रतिनिधिहरूले भविष्यमा यस्ता अवस्था दोहोरिन नदिन सम्बन्धित पक्षले जिम्मेवारीपूर्वक भूमिका निर्वाह गर्नुपर्ने माग गरेका छन् ।

यस विषयमा प्रमुख प्रशासकीय अधिकृत खतिवडासँग प्रतिक्रिया लिन पटक–पटक प्रयास गरिएपनि उनको मोबाइल फोन बन्द रहेकाले प्रतिक्रिया प्राप्त हुन सकेन । बैठक स्थगित भएसँगै आगामी नीति तथा कार्यक्रम कहिले प्रस्तुत गरिने भन्नेबारे गाउँपालिकाले हालसम्म नयाँ मिति सार्वजनिक गरेको छैन । जनप्रतिनिधिहरूले भने शीघ्र बैठक आह्वान गरी गाउँपालिकाको नियमित कामकारबाहीलाई प्रभावित हुन नदिन आग्रह गरेका छन् ।