वीरगंज (पर्सा), २४ जेठ । करिब २५ वर्षअघि भएको एक हत्या प्रकरणमा संलग्न फरार अभियुक्तलाई पर्सा प्रहरीले पक्राउ गरेको छ । लामो समयदेखि कानुनी कारबाहीबाट बच्दै आएका आरोपीलाई विशेष सूचनाका आधारमा नियन्त्रणमा लिइएको प्रहरीले जनाएको छ । जिल्ला प्रहरी कार्यालय पर्साका अनुसार २०५८ फागुन २६ गते तत्कालीन धौरे गाविस–८ (हाल पकाहा मैनपुर गाउँपालिका–१) निवासी २६ वर्षीया रावडी भन्ने रीना देवीको हत्या भएको थियो । घरायसी विवादका क्रममा घाँटी थिचेर उनको हत्या गरिएको अनुसन्धानबाट खुलेको थियो ।
घटनापछि फरार रहेका आरोपी काशी महतो चाई भन्ने ५० वर्षीय काशीप्रसाद चौहानलाई प्रहरी टोलीले सोमबार बिहान करिब ७ बजे आफ्नै घरमा लुकिछिपी बसेको अवस्थामा पक्राउ गरेको हो । उनी पनि सोही स्थानका स्थायी बासिन्दा हुन् । प्रहरीले कर्तव्य ज्यान (ज्यान सम्बन्धी कसुर) मुद्दामा पर्सा जिल्ला अदालतबाट तीन दिनको म्याद थप अनुमति लिएर थप अनुसन्धान अघि बढाएको जनाएको छ ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतका अनुसार घटनाको लामो अन्तरालपछि अभियुक्त पक्राउ परेकाले अनुसन्धानलाई निष्कर्षमा पुर्याउने प्रक्रिया अगाडि बढाइएको छ । प्रहरीले घटनासम्बन्धी अन्य पक्षमाथि समेत अनुसन्धान जारी रहेको जनाएको छ । 
प्रतिक्रिया दिनुहोस् !