कलैया (बारा), ९ जेठ । बाराको कलैयामा आयोजित राष्ट्रिय स्वतन्त्र पार्टी (रास्वपा)को जिल्ला स्तरीय विस्तारित बैठकमा विवाद भएको छ । करणराज होटलमा शनिबार आयोजित बैठकमा संस्थापन पक्ष र संस्थापन इतरका पक्षबीच विवाद भएको थियो । कारवाहीमा परेका बाराका निवर्तमान जिल्ला सभापति पक्ष र उनको विरोधी पक्षबीच विवाद बढ्दै झडपमा परिणत भएको कार्यक्रमका सहभागिहरूले बताएका छन् ।
निवर्तमान सभापति पक्षले निर्वाचित सांसदहरूको कुरा, गलत निर्णय र हस्ताक्षेपको कारण जिल्ला पार्टीमा समस्या आएको भन्दै सांसदहरूको विरोध गरेका थिए । तनाव बढदै गएपछि सांसद तथा पार्टी नेताहरू कार्यकर्ताको सुरक्षामा हलबाट बाहिर निस्किएका हुन् । स्थिती साम्य पार्न प्रहरीले हस्ताक्षेप गरेको थियो । जिल्ला अधिवेशनसम्बन्धी छलफलका क्रममा केही असन्तुष्ट पक्षले होहल्ला गर्ने प्रयास गरेपछि सामान्य विवाद भएको सांसद रहबर अन्सारीको भनाई छ । अन्सारीले पार्टीबाट निष्काशित केही व्यक्तिहरूले कार्यक्रममा अवरोध गर्न खोजेको दाबी गर्दै त्यसैले तनावको अवस्था सिर्जना भएको बताए ।
यसअघि वैशाख २७ गते रास्वपा केन्द्रीय समितिले चन्दन स्वर्णकारको सभापतित्वमा रहेको बारा जिल्ला समिति विघटन गरेको थियो, सो पछि संस्थापन पक्ष र इत्तर पक्षबीच झन द्वन्द चर्किएकोे छ । शनिबारको कार्यक्रममा बाराका चारैजना सांसद रहबर अन्सारी, अरबिन्द साह, गणेश धिमाल र चन्दन सिंहका साथै काठमाडौंबाट आएका पार्टी नेता राजन शर्मा, कामिनी चौधरी तथा मधेश प्रदेश स्तरका नेताहरूको पनि उपस्थिति थियो ।
संस्थापन र संस्थापक पक्षबीच कुटाकुट, तीनजना घाइते
राष्ट्रिय स्वतन्त्र पार्टी (रास्वपा) बाराको विस्तारित बैठक तनावग्रस्त बनेपछि पार्टीभित्रको आन्तरिक विवाद सतहमै आएको छ । संस्थापन पक्ष र संस्थापक कार्यकर्ताबीच चर्किएको विवादले कुटाकुटको अवस्था सिर्जना गर्दा तीनजना घाइते भएका छन् । कलैयास्थित करणराज पार्टी प्यालेसमा आयोजित बैठकका क्रममा झडप हुँदा महागढीमाई नगर सभापति बिक्रम यादव, सिम्रौनगढ नगर सभापति साहेब अन्सारीसहित तीन जना घाइते भएका हुन् । उनीहरूको उपचार कलैया प्रादेशिक अस्पतालमा भइरहेको जनाइएको छ ।
संस्थापक जिल्ला अध्यक्ष चन्दन स्वर्णकार निकट कार्यकर्ताले पुराना तथा संस्थापक सदस्यहरूमाथि हातपात भएपछि स्थिति नियन्त्रण बाहिर गएको आरोप लगाएका छन् । उपचाररत नगर सभापति बिक्रम यादवले प्रतिनिधिसभा सदस्य अरविन्द साहले आफ्नो हात समातेर बाहिरबाट ल्याइएका व्यक्तिमार्फत आफूलाई कुटपिट गराएको आरोप लगाए । असन्तुष्ट पक्षका अनुसार स्थानीय तह निर्वाचनका लागि उम्मेदवारको टिकट पहिले नै बिक्री गरिएको भन्ने सूचना सार्वजनिक भएपछि त्यसबारे स्पष्टीकरण माग्दा विवाद सुरु भएको हो । नयाँ प्रवेश गरेका व्यक्तिहरूले कार्यसमितिमा प्रभाव जमाउन खोजेको र लामो समयदेखि संगठन निर्माणमा खटिएका कार्यकर्तालाई पाखा लगाइएको भन्दै संस्थापक पक्ष आक्रोशित बनेको बताइएको छ । 
पार्टीभित्रको विवाद समाधान गर्न केन्द्रले प्रतिनिधिका रूपमा कामनी चौधरीलाई पठाएर विस्तारित बैठक आयोजना गरे पनि कार्यक्रम तनावमा परिणत भएको सहभागीहरूले बताएका छन् । विवाद चर्किएपछि आक्रोशित कार्यकर्ताले बाराका चारै जना सांसदमाथि समेत हातपातको प्रयास गरेका थिए । स्थिति थप तनावपूर्ण बनेपछि सुरक्षाकर्मीले क्षेत्र नम्बर १ का सांसद गणेश धिमाल, क्षेत्र नम्बर २ का सांसद चन्दन सिंह, क्षेत्र नम्बर ३ का सांसद अरविन्द साह, क्षेत्र नम्बर ४ का सांसद रहबर अन्सारी तथा केन्द्रीय प्रतिनिधि कामनी चौधरीलाई सुरक्षा घेराभित्र राख्दै बैठकस्थलबाट बाहिर निकालेका थिए ।
घटनापछि सांसदहरू कलैयाको बरेवा दरबार होटलमा पुगेर पत्रकार सम्मेलन गरेका थिए । उनीहरूले सञ्चारमाध्यममा आएको ‘सांसदहरू लेखेटिए’ भन्ने समाचारको खण्डन गर्दै बैठकमा कुनै अप्रिय घटना नभएको दाबी गरेका छन् । सांसद गणेश धिमाल, चन्दन सिंह र अरविन्द साहले आफूहरूमाथि कुटपिट नभएको बताएका छन् । प्रतिनिधिसभा सदस्य रहबर अन्सारीले जिल्ला अधिवेशनको तयारीका लागि बैठक आयोजना गरिएको उल्लेख गर्दै निष्काशित पक्षले कार्यक्रम बिथोल्न खोजेको आरोप लगाए । विवादका बीच पनि बैठक सफलतापूर्वक सम्पन्न भएको उनको दाबी छ ।
गत वैशाख २७ गते रास्वपाको केन्द्रीय समितिले बारा जिल्ला कार्यसमिति विघटन गरेको थियो । त्यसपछि जेठ ६ गते संस्थापक जिल्ला सभापति चन्दन स्वर्णकारको पार्टी सदस्यता खारेज गरिएसँगै जिल्ला संगठनभित्रको विवाद झन् गहिरिँदै गएको देखिएको छ । 
प्रतिक्रिया दिनुहोस् !