वीरगंज (पर्सा), ८ जेठ । जिल्लाको सुरक्षा व्यवस्थाको केन्द्र मानिने जिल्ला प्रहरी कार्यालय पर्साकै मुख्य गेट अगाडिबाट दिनदहाडै केटिएम डुक मोटरसाइकल चोरी भएपछि वीरगंजको सुरक्षा अवस्थामाथि गम्भीर प्रश्न उठेको छ । प्रहरीको बाक्लो उपस्थिती, ट्राफिक निगरानी र सिसिटिभी जडान रहेको संवेदनशील क्षेत्रमा नै चोरीको घटना हुनु सामान्य नागरिकका लागि त्रास र प्रहरी प्रशासनका लागि लज्जाको विषय बनेको छ ।
शुक्रबार दिउँसो करिब २ः१२ बजे जिल्ला प्रहरी कार्यालय पर्सा अगाडि पार्किङ गरेर राखिएको मधेश प्रदेश ०३–०३९ प ७१७८ नम्बरको केटिएम डुक मोटरसाइकल अज्ञात व्यक्तिले चोरी गरेको हो । उक्त मोटरसाइकल धोबिनी गाउँपालिका–१ निवासी प्रमेश्वर साह रौनियारको नाममा दर्ता रहेको बताइएको छ ।
घटना जिल्ला प्रहरी कार्यालय, जिल्ला ट्राफिक प्रहरी कार्यालय तथा जिल्ला हुलाक कार्यालय नजिकैको अत्यन्त व्यस्त सडक खण्डमा भएको हो । स्थानीयका अनुसार उक्त क्षेत्रमा दिनभर प्रहरी र ट्राफिक प्रहरीको बाक्लो परिचालन हुने गर्छ । त्यसैमाथि पछिल्लो समय दुर्गा प्रसाइँ पक्राउ प्रकरणपछि जिल्ला प्रहरी कार्यालय अगाडि समर्थक तथा सेवाग्राहीको भीड बढेकाले सुरक्षा व्यवस्था थप कडा बनाइएको दाबी प्रहरीकै छ । तर यथार्थ भने उल्टो देखिएको छ ।
प्रहरीकै निगरानी क्षेत्रबाट खुलेआम मोटरसाइकल चोरी भएपछि ‘वीरगंज अब चोरहरुको सुरक्षित थलो बन्दै गएको हो ?’ भन्ने प्रश्न सर्वसाधारणबीच उठ्न थालेको छ । प्रहरी स्रोतका अनुसार घटनामा संलग्न व्यक्ति नयाँ होइन । सिसिटिभी फुटेज हेर्दा यसअघि भएका कम्तीमा चारवटा मोटरसाइकल चोरी घटनामा पनि उही व्यक्ति संलग्न रहेको आशंका गरिएको छ । तर विडम्बना, पटक पटक सिसिटिभीमा देखिएको व्यक्ति अझै पक्राउ पर्न सकेको छैन । यसले प्रहरीको अनुसन्धान क्षमता, सक्रियता र इच्छाशक्तिमाथि नै प्रश्न खडा गरेको छ ।
अर्कोतर्फ, पीडित पक्षले घटनास्थलको सिसिटिभी भिडियो तथा तस्बिर माग्दा प्रहरी प्रशासनले उपलब्ध गराउन नमानेको आरोप लगाएको छ । यदि प्रहरीसँग स्पष्ट दृश्य र पहिचानयोग्य प्रमाण हुँदाहुँदै पनि आरोपी पक्राउ पर्दैन भने त्यसले प्रहरीको कमजोरी मात्रै होइन, लापरवाही र जिम्मेवारीहीन कार्यशैलीलाई समेत उजागर गर्ने देखिन्छ ।
सामान्य नागरिकले आफ्नो सवारी सुरक्षित ठान्ने स्थान नै प्रहरी कार्यालय वरपर हो । तर प्रहरी कार्यालयकै गेट अगाडिबाट मोटरसाइकल चोरी हुनुले वीरगंजको सुरक्षा प्रणाली कमजोर बन्दै गएको संकेत दिएको छ । चोरी, लुटपाट र आपराधिक गतिविधि नियन्त्रणमा प्रहरी प्रभावकारी बन्न नसकेको गुनासो बढिरहेका बेला यो घटनाले प्रहरी प्रशासनमाथिको जनविश्वासलाई थप कमजोर बनाएको छ । अब प्रश्न उठेको छ जब प्रहरीकै आँखा अगाडि नागरिकको सम्पत्ति सुरक्षित रहँदैन भने सर्वसाधारणले सुरक्षा कसबाट खोज्ने ?
मोटरसाइकल चोरीको घटनाबारे सवारीधनीले जिल्ला प्रहरी कार्यालय पर्सामा जानकारी गराइसकेको बताइएको छ । 
प्रतिक्रिया दिनुहोस् !