वीरगंज (पर्सा), ७ जेठ । नेपाल पत्रकार महासंघ पर्सा शाखाले निर्वतमान अध्यक्ष अनुप तिवारीसँग माइनुटसहितका संस्थागत कागजात तीन दिनभित्र उपलब्ध गराउन औपचारिक आग्रह गरेको छ । शाखाले सदस्यता शुद्धीकरण प्रक्रियालाई व्यवस्थित र पारदर्शी बनाउन विगतका निर्णय तथा अभिलेख आवश्यक रहेको जनाएको छ । महासंघ पर्साका अध्यक्ष ओमप्रकाश खनालले तिवारीलाई पठाएको पत्रमा सदस्यता शुद्धीकरणसम्बन्धी काम अघि बढाउन पुराना माइनुट, निर्णय तथा अभिलेख अध्ययन अपरिहार्य रहेको उल्लेख गरिएको छ ।
महासंघ पर्साका सचिव विजयकुमार महतोद्वारा हस्ताक्षरित पत्रमा तिवारीकै संयोजकत्वमा गठित सदस्यता शुद्धीकरण संघर्ष समितिले उठाएका मागप्रति शाखाको ध्यानाकर्षण भएको जनाइएको छ । साथै तिवारी नेतृत्वकै कार्यकालमा वितरण गरिएका सदस्यतामाथि समेत शुद्धीकरणको माग उठेकाले त्यसबेलाका प्रक्रिया, निर्णय र आधार यकिन गर्न सम्बन्धित कागजात आवश्यक रहेको उल्लेख गरिएको छ । महासंघका अनुसार तत्कालीन कार्यसमितिले हालसम्म जिल्ला शाखाको माइनुट तथा अन्य संस्थागत अभिलेख वर्तमान कार्यसमितिलाई हस्तान्तरण गरेको छैन ।
पत्रमा वर्तमान कार्यसमितिको २०८१ पुस ३ गते बसेको पहिलो बैठकले शाखाका कोषाध्यक्ष तथा तत्कालीन कोषाध्यक्षसमेत रहेका सञ्जीव कुमार मिश्रलाई सम्पूर्ण हरहिसाब तथा चलअचल सम्पत्तिको विवरण ३० दिनभित्र पेश गर्न जिम्मेवारी दिएको स्मरण गराइएको छ । तर ५१८ दिन बितिसक्दा पनि आवश्यक विवरण उपलब्ध नगराइएको महासंघले जनाएको छ ।
महासंघले पटकपटक आग्रह गर्दा पनि माइनुटलगायतका आवश्यक कागजात बुझाउन आनाकानी भइरहेको दाबी गर्दै अभिलेख अभावका कारण शाखाको नियमित कार्य सञ्चालनमै समस्या उत्पन्न भएको उल्लेख गरेको छ । त्यसैले सदस्यता शुद्धीकरण प्रक्रियालाई निष्पक्ष र प्रभावकारी रूपमा अघि बढाउन विगतका सम्पूर्ण संस्थागत निर्णय तथा अभिलेख अध्ययन आवश्यक रहेकाले सम्बन्धित कागजात तीन दिनभित्र शाखा कार्यालयमा बुझाउन आग्रह गरिएको छ । अन्यथा शाखा नियमअनुसार अगाडि बढ्ने चेतावनीसमेत पत्रमा समावेश गरिएको छ ।
उक्त पत्रको बोधार्थ नेपाल पत्रकार महासंघ केन्द्रीय कार्यालय काठमाडौं र नेपाल पत्रकार महासंघ मधेश प्रदेश कार्यालय धनुषामा समेत पठाइएको महासंघले जनाएको छ । यसअघि सदस्यता शुद्धीकरण तथा नयाँ सदस्यता वितरणको माग गर्दै निर्वतमान अध्यक्ष अनुप तिवारीको संयोजकत्वमा गठित संघर्ष समितिले महासंघ पर्साका अध्यक्ष ओमप्रकाश खनाललाई ज्ञापनपत्र बुझाएको थियो । 
प्रतिक्रिया दिनुहोस् !