वीरगंज (पर्सा), ७ जेठ । वीरगंजस्थित हरिखेतान बहुमुखी क्याम्पसमा लामो समयदेखि देखिएको समस्या समाधानमा सरकार र जिल्ला प्रशासन उदासीन बनेको भन्दै नेपाल विद्यार्थी संघ (नेवि संघ) का नेता कृष पटेलले कडा असन्तुष्टि जनाएका छन् । उनले क्याम्पसको वर्तमान अवस्थालाई विद्यार्थीको भविष्यसँग भइरहेको गम्भीर खेलवाडको संज्ञा दिएका छन् ।
पटेलद्वारा जारी धारणा अनुसार पर्सा, बारा र रौतहटका हजारौँ विद्यार्थी अध्ययनरत रहेको हरिखेतान बहुमुखी क्याम्पस विगतदेखि सामुदायिक स्वरूपमा सञ्चालन हुँदै आएको थियो । त्रिभुवन विश्वविद्यालयबाट नियमित अनुदान पाइरहेको क्याम्पसलाई केही वर्षअघि निजी मोडलमा सञ्चालन गर्न खोजिएपछि विश्वविद्यालयले अनुदान रोकिएको र त्यसपछि समस्या झन् जटिल बनेको उनले उल्लेख गरेका छन् ।
उनले विगतमा क्याम्पस व्यवस्थापन समितिमा प्रमुख जिल्ला अधिकारीसहित समाजका विभिन्न क्षेत्रका प्रतिनिधिहरूको सहभागिता रहने व्यवस्था रहेको स्मरण गराउँदै अहिले सीमित व्यक्तिको नियन्त्रणमा रहेको समितिले विद्यार्थी हितभन्दा शुल्क असुलीलाई प्राथमिकता दिएको आरोप लगाए । गरिब तथा मध्यमवर्गीय परिवारका विद्यार्थीको भविष्य जोखिममा पारिएको उनको भनाइ छ ।
पटेलका अनुसार क्याम्पसमा शिक्षक तथा कर्मचारी ३८ दिनदेखि निरन्तर धर्नामा छन् । यसका कारण शैक्षिक गतिविधि प्रभावित बनेका छन् भने दैनिक विवादका कारण क्याम्पसको शान्ति–सुरक्षामा समेत असर परेको उनले बताएका छन् ।
उनले जिल्लाबाट निर्वाचित सांसदहरू तथा सरकार समस्या समाधानप्रति गम्भीर नदेखिएको आरोप लगाउँदै विशेषगरी राष्ट्रिय स्वतन्त्र पार्टीप्रति संकेत गर्दै निर्वाचनअघि गरिएका विकास र परिवर्तनका प्रतिबद्धता व्यवहारमा कार्यान्वयन हुन नसकेको टिप्पणी गरे । ‘जनताले दिएको मतको सम्मान हुन सकेको छैन,’ उनले धारणा व्यक्त गरेका छन् ।
नेवि संघ नेता पटेलले प्रमुख जिल्ला अधिकारीले लामो समयदेखि देखिएको विवाद समाधानमा प्रभावकारी भूमिका निर्वाह गर्न नसकेको आरोप लगाउँदै तत्काल सरुवाको मागसमेत गरेका छन् । साथै क्याम्पसको समस्या समाधानका लागि सरकार, जिल्ला प्रशासन र सम्बन्धित निकायले शीघ्र वार्ता तथा आवश्यक पहल थाल्नुपर्ने माग उनले गरेका छन् । 
प्रतिक्रिया दिनुहोस् !