वीरगंज (पर्सा), ६ जेठ । वीरगंज स्थित हरिखेतान क्याम्पसको वेथीती बारे प्रतिनिधी सभामा कुरा उठेको छ । पर्सा क्षेत्र नं. १ का सांसद हरि पन्तले हरिखेतान बहुमुखी क्याम्पसमा देखिएको विवाद समाधानका लागि सरकारले छानबिन समिति गठन गर्नुपर्ने माग गरेका छन् । प्रतिनिधि सभा बैठकको शून्य समयमा बोल्दै सांसद पन्तले सो माग राखेका हुन् ।
वीरगंजमा शिक्षाको धरोहरको रुपमा स्थापीत क्याम्पसमा अहिले झडपस्थलमा परिणत भएको भन्दै पन्तले गम्भीर चिन्ता व्यक्त गरे । उनले क्याम्पसमा करिब चार हजार विद्यार्थी तथा १५० जना प्राध्यापक र कर्मचारी कार्यरत रहेको उल्लेख गर्दै दैनिकजसो हुने नाराजुलुस र झडपका कारण विद्यार्थीहरूको भविष्य अन्योलमा परेको बताए ।
सांसद पन्तका अनुसार केही दाता परिवारका व्यक्तिहरूले पटक–पटक क्याम्पसको मूल विधान संशोधन गर्दै सामुदायीक क्याम्पसलाई नीजिकरण तर्फ लान खोजेको अवस्था विग्रिएको हो । उनले हालै भएको एक झडपमा क्याम्पस प्रमुख नै दुर्व्यवहारमा परेको तथा केही कर्मचारी अझै प्रहरी हिरासतमा रहेको पनि संसदलाई जानकारी दिएका छन् । 
प्रतिक्रिया दिनुहोस् !