जनकपुर (धनुषा), ५ जेठ । जनता समाजवादी पार्टी नेपाल (जसपा नेपाल) र लोकतान्त्रिक समाजवादी पार्टी नेपाल (लोसपा नेपाल)बीच पार्टी एकता भएपछि मधेश प्रदेशमा संसदीय दलको नेतृत्वलाई लिएर नयाँ विवाद सुरु भएको छ । दुवै पक्षका नेताले आफू नै संसदीय दलको आधिकारिक नेता भएको दाबी गरेपछि प्रदेशसभा गतिविधि नै प्रभावित बनेको हो । दुवै पार्टीबीच २०८२ पुस २७ गते एकीकरण गर्ने सहमति भएको थियो । एकीकरणपछि पार्टीको नाम जसपा नेपाल नै कायम राखिएको थियो । तर प्रदेशसभामा दलको नेता को हुने भन्ने विषयमा सहमति नजुट्दा राजनीतिक अन्योल बढेको छ ।
गत शुक्रबार मुख्यमन्त्री कृष्णप्रसाद यादवले लिन लागेका विश्वासको मतसमेत यही विवादका कारण प्रभावित भयो । सदन सञ्चालनअघि बसेको कार्यव्यवस्था परामर्श समितिको बैठकमा तत्कालीन जसपा नेपालका संसदीय दलका नेता सरोजकुमार यादव र तत्कालीन लोसपा नेपालका नेता जितेन्द्र सोनल दुवैले आफू नै एकीकृत दलको नेता भएको दाबी गरेका थिए । बैठकमा दुवै नेताले सभामुखसमक्ष आफ्ना लागि छुट्याइएको आसन र हैसियतबारे प्रश्न उठाएपछि सदनको वातावरण तनावपूर्ण बनेको थियो । दलको नेताको विषय टुंगो नलागेपछि मुख्यमन्त्रीको विश्वासको मत लिने प्रक्रिया पनि आगामी शुक्रबारसम्मका लागि सारिएको छ ।
यसैबीच, जसपा नेपालले बुधबार मधेश प्रदेश संसदीय दलको नेता चयन गर्ने तयारी गरेको छ । नेता सरोजकुमार यादवले विवाद समाधानका लागि दुवै पक्षबीच छलफल हुने जानकारी दिएका छन् । उनका अनुसार सहमतिबाट नेतृत्व चयन हुन नसके निर्वाचनमार्फत दलको नेता तय गरिनेछ । स्रोतका अनुसार संसदीय दलको नेताका लागि पूर्वमुख्यमन्त्री सरोजकुमार यादव, लालबाबु राउत तथा जितेन्द्र सोनल बीच प्रतिस्पर्धा हुन सक्ने चर्चा छ । पार्टी एकीकरणपछि मधेश प्रदेशसभामा जसपा नेपाल सबैभन्दा ठूलो दल बनेको छ । तत्कालीन जसपा नेपालका १८ र लोसपा नेपालका ८ सांसद जोडिँदा दलको संख्या २६ पुगेको छ । निलम्बनमा रहेका दुई सांसदलाई समेत जोड्दा संख्या २८ पुग्ने बताइएको छ ।
प्रदेशसभामा दोस्रो ठूलो दल केपी शर्मा ओली नेतृत्वको नेपाल कम्युनिष्ट पार्टी (एमाले)का २४ सांसद छन् भने नेपाली कांग्रेसका २२ सांसद रहेका छन् । त्यस्तै नेपाल कम्युनिष्ट पार्टी (माओवादी केन्द्र) का १४ र जनमत पार्टी का १२ सांसद रहेका छन् । 
प्रतिक्रिया दिनुहोस् !