महोत्तरी, ४ जेठ । नेपाल–भारत सीमामा संयुक्त रूपमा सञ्चालन भइरहेको सीमा स्तम्भ (पिलर) मर्मत तथा संरक्षण कार्यको महोत्तरीमा स्थलगत अनुगमन गरिएको छ । सोमबार इन्द्रदेव यादव सहित नेपाली तथा भारतीय सुरक्षा निकायका प्रतिनिधिहरूले सीमा क्षेत्रमा पुगेर मर्मत कार्यको निरीक्षण गरेका हुन् ।
अनुगमनका क्रममा जीर्ण, क्षतिग्रस्त तथा हराउन थालेका सीमा स्तम्भहरूको पहिचान गरी पुनः मर्मत तथा व्यवस्थित गर्ने काम भइरहेको जानकारी दिइएको छ । दुवै देशका प्राविधिक टोलीको समन्वयमा सीमा स्तम्भको मापन, रङरोगन तथा आवश्यक संरचनात्मक सुधारको कार्य अघि बढाइएको बताइएको छ ।
प्रमुख जिल्ला अधिकारी इन्द्रदेव यादवले सीमा स्तम्भ संरक्षणले सीमा व्यवस्थापनलाई थप प्रभावकारी बनाउने बताए । उनले यस्ता कार्यले सीमा क्षेत्रमा हुन सक्ने विवाद तथा अतिक्रमण नियन्त्रणमा समेत सहयोग पुग्ने धारणा राखे ।
उनका अनुसार नेपाल–भारतबीचको मैत्रीपूर्ण सम्बन्धलाई सुदृढ बनाउन संयुक्त रूपमा भइरहेको सीमा संरक्षण कार्य महत्वपूर्ण छ । साथै सीमा क्षेत्रको शान्ति, सुरक्षा र प्रशासनिक समन्वयलाई मजबुत बनाउन स्थानीय प्रशासन, सुरक्षा निकाय तथा प्राविधिक टोली निरन्तर सक्रिय रहेको उनले बताए ।
अनुगमनमा सशस्त्र प्रहरी बल नेपाल, नेपाल प्रहरी, नापी कार्यालयका प्रतिनिधि तथा भारतीय सुरक्षा निकायका अधिकारीहरूको सहभागिता रहेको थियो ।
प्रतिक्रिया दिनुहोस् !