वीरगंज (पर्सा), १ जेठ । संविधान संशोधनका विषयमा बहसलाई थप व्यापक बनाउने उद्देश्यसहित सरकारले गठन गरेको “संविधान संशोधन बहशपत्र तयार कार्यदल” ले छलफलका लागि थप २० जना जेनजी (Gen Z) युवाहरुलाई आमन्त्रण गरेको छ । उक्त सूचीमा पर्साका तीन युवा समेत समावेश भएका छन् ।
गत वैशाख ३० गते प्रधानमन्त्रीका प्रमुख राजनीतिक सल्लाहकार असिम शाहको नेतृत्वमा रहेको कार्यदलले थप २० जना जेनजी युवासँग संवाद गर्ने निर्णय गरेको थियो । सोही निर्णयअनुसार पर्साबाट जेनजी अभियन्ता विशेष साह, अधिवक्ता अनिल साह तथा अर्जुन साह छनोटमा परेका हुन् ।
कार्यदलका सदस्य सचिव लिलाधर सुबेदीका अनुसार उनीहरुलाई आज शुक्रबार साँझ ५ बजे प्रधानमन्त्री तथा मन्त्रिपरिषद्को कार्यालयमा आयोजना हुने छलफल कार्यक्रममा सहभागी हुन निमन्त्रणा गरिएको छ । संविधान संशोधनका लागि तयार गरिने बहशपत्रमा युवाहरुको दृष्टिकोण, सुझाव र सक्रिय सहभागिता समेट्ने उद्देश्यले जेनजी पुस्तासँग प्रत्यक्ष संवाद गर्न लागिएको सुबेदीले बताएका छन् ।
सरकारले संविधान संशोधनसम्बन्धी बहसलाई समावेशी र प्रभावकारी बनाउन युवा, विज्ञ तथा विभिन्न सरोकारवाला पक्षहरूसँग चरणबद्ध रूपमा छलफललाई निरन्तरता दिइरहेको जनाएको छ ।
प्रतिक्रिया दिनुहोस् !