वीरगंज (पर्सा), २९ वैशाख । ट्रान्सफर्मर विस्फोटमा गम्भीर घाइते भएका एक मजदुरको उपचारका क्रममा मृत्यु भएको छ । पर्साको बहुदरमाई नगरपालिका–३ निवासी ४५ वर्षीय चनरजित राउतको काठमाडौंस्थित वीर अस्पताल मा उपचारका क्रममा आज मृत्यु भएको परिवार स्रोतले जनाएको छ ।
राउत वीरगंज महानगरपालिका–२३ मा रहेको सन तारा इलेक्ट्रिक प्रा.लि. मा कार्यरत थिए । उनी जितपुरसिमरा उपमहानगरपालिका–२३ भलुईस्थित एभरेस्ट छाला कम्पनी मा ट्रान्सफर्मर जडान गर्ने क्रममा भएको विस्फोटमा गम्भीर घाइते भएका थिए । विस्फोटबाट उनको शरीरका अधिकांश भाग जलेको थियो ।
प्रारम्भिक उपचारपछि उनलाई थप उपचारका लागि काठमाडौं लगिएको थियो । मजदुरको मृत्यु भएपछि परिवारजन तथा आफन्तहरूले उचित क्षतिपूर्तिको माग गर्दै एभरेस्ट छाला कम्पनी अगाडि प्रदर्शन गरेका छन् । प्रदर्शनकारीहरूले पीडित परिवारलाई न्याय, राहत तथा कम्पनीको जिम्मेवारी सुनिश्चित गर्न माग गरेका छन् ।
घटनापछि केही समय क्षेत्रको अवस्था तनावग्रस्त बनेको थियो । स्थिति नियन्त्रणमा लिन प्रहरी परिचालन गरिएको जनाइएको छ । प्रहरीले घटनाबारे थप अनुसन्धान भइरहेको जनाएको छ । 
प्रतिक्रिया दिनुहोस् !