वीरगंज (पर्सा), २९ वैशाख । पर्सा प्रहरीले लागूऔषधविरुद्ध सञ्चालन गरिरहेको ‘सेवनकर्ता खोजी तथा सुधार महाअभियान’ अन्तर्गत वीरगंजबाट लागूऔषधसहित चार जनालाई पक्राउ गरेको छ ।
जिल्ला प्रहरी कार्यालय पर्साका अनुसार वीरगंज महानगरपालिका–१६ स्थित शंकराचार्य गेट चेकपोइन्टमा भारतबाट नेपालतर्फ आउने पैदल यात्री तथा सवारी साधनमाथि गरिएको विशेष जाँचका क्रममा उनीहरू नियन्त्रणमा परेका हुन् । पक्राउ पर्नेहरूमा २६ वर्षीय पैयाल अन्सारी, ३४ वर्षीय संजय साह, २१ वर्षीय विशाल यादवसहित चार जना रहेका छन् ।
प्रहरीले पैयाल अन्सारी र संजय साहको साथबाट ०.१० मिलिग्राम खैरो हिरोइन र ४ ग्राम चरेस बरामद गरेको जनाएको छ । यस्तै, संजय साहकै साथबाट थप ३ ग्राम ४२ मिलिग्राम खैरो हिरोइन फेला परेको प्रहरीले जानकारी दिएको छ । त्यसैगरी विशाल यादवबाट ०.४३ मिलिग्राम खैरो हिरोइन बरामद गरिएको बताइएको छ ।
पक्राउ परेका सबैमाथि लागूऔषध नियन्त्रण ऐनअन्तर्गत अनुसन्धान प्रक्रिया अघि बढाइएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले बताएका छन् । 
प्रतिक्रिया दिनुहोस् !