वीरगंज (पर्सा), २९ वैशाख । नेपाल नेत्रज्योति संघको आयोजनामा श्री दीपनारायण आदर्श नमूना माध्यमिक विद्यालयमा निःशुल्क आँखा परीक्षण, चश्मा तथा औषधि वितरण कार्यक्रम सम्पन्न भएको छ । विद्यार्थी र शिक्षकहरूको आँखासम्बन्धी स्वास्थ्य अवस्थाको परीक्षण गर्ने उद्देश्यले सञ्चालन गरिएको उक्त शिविरबाट सयौं लाभान्वित भएका छन् ।
कार्यक्रममा नेपाल नेत्रज्योति संघ पर्साका सभापति भगवती चौधरीले सभापतित्व गरेका थिए भने संघका केन्द्रीय वरिष्ठ उपाध्यक्ष श्यामकुमार पोखरेल प्रमुख अतिथिका रूपमा सहभागी भएका थिए । पोखरेलले विद्यार्थीहरूलाई चश्मा तथा उपचारसम्बन्धी पर्चा वितरण गर्दै शिविरको उद्घाटन गरेका थिए ।
आयोजकका अनुसार शिविरमा विद्यालयका विद्यार्थी तथा शिक्षक गरी करिब ५१५ जनाको आँखा परीक्षण गरिएको थियो । परीक्षणका क्रममा आवश्यकता अनुसार निःशुल्क औषधि र चश्मासमेत वितरण गरिएको जनाइएको छ ।
कार्यक्रम सम्पन्न भएपछि विद्यालय व्यवस्थापन समिति तथा शिक्षकहरूले नेपाल नेत्रज्योति संघप्रति आभार व्यक्त गरेका थिए । विद्यालय व्यवस्थापन समितिका सदस्य राजन श्रीवास्तव ले यस्ता स्वास्थ्य शिविरले विद्यार्थीमा स्वास्थ्य चेतना बढाउनुका साथै आवश्यक उपचारमा सहज पहुँच विस्तार गर्न महत्वपूर्ण योगदान पुर्याउने बताए ।
नेपाल नेत्रज्योति संघले आगामी दिनमा पनि समुदायस्तरमा यस्ता निःशुल्क स्वास्थ्य शिविरलाई निरन्तरता दिने जनाएको छ । 
प्रतिक्रिया दिनुहोस् !